7 ‘mangngalap’ nagkalap iti fishpond

CABUGAO, Ilocos Sur – Naisalsalumina dagitoy a mangngalap ta fishpond a kukua ti barangay ti nagkalapanda.

Nasukalan a nagkalap iti fishpond a kukua ti Rang-ay Association da Ariel Tisbe y Tisbe, 41, naasawaan; Marvin Pascua y Valladores, 24, baro; Ian Morales y Paiste, 25, baro; Reynaldo Paiste y Tisbe, 56, naasawaan; Williard Paiste y Ancheta; Daren Dave Morales y Paiste, 28; married ken Roland Morales y Paiste, 48; naasawaan, agpapada amin a residente iti Barangay Salomague, Cabugao, Ilocos Sur.

Impulong ni Barangay Kagawad Victorino Ramos Sesuca, 54, naasawaan, ken residente iti nadakamat a barangay dagiti suspek kalpasan a nasukalanna ida nga agkalkalap iti fishpond idi agsapa ti Agosto 6.

Segun iti report, nasapa a napan iti fishpond ni Ramos tapno pakanenna dagiti lames ngem naduktalanna nga adda naipakat nga iket iti fishpond ket nakitana laengen dagiti suspek a nagtataray iti nadumaduma a direksion.

Impan dagiti polis dagiti suspek agraman ti lames a kinalapda nga agdagsen iti sumurok kumurang lima a kilos iti police station para iti naing-inget pay a pannakaimbestiga ken umisu a disposision.#