SANTIAGO, Ilocos Sur – Pito a mangngalap manipud iti Lingsat, Sta. Maria, Ilocos Sur ti agisaysayangkat iti illegal a panagkalap iti kabaybayan ti San Esteban ken ditoy nga ili.
Nakemmeg ditoy da Reynaldo Santiago y Umipig, Clarito Costales y Cabbab, ken Whisley Daproza, agpapada a residente iti barangay Lingsat, Santa Maria, Ilocos Sur ket nakumpiska kadakuada ti motorized a bilog a maris berde, maysa a compressor, 2 a pana ken aganay 10 a kilos a nakalapanda a nadumaduma ti klaseda nga ikkan.
Mismo a ni Mayor Josefino Miranda ti timmawag ken ni PSI Cirilo Butigan, agdama a hepe ti polis ditoy ket impakaammona ti kaadda dagiti agkalkalap iti fish sanctuary a masarakan iti Barangay Butol iti daytoy nga ili.
Napalubosan met laeng dagiti mangngalap kalpasan ti panagbayadda iti multa.
Kabayatanna, uppat pay a mangngalap a taga-Lingsat, Sta. Maria, Ilocos Sur ti natiliw bayat ti panagkalapda iti kabaybayan iti San Esteban, a nagaramat iti compressor.
Natiliw da Michael Daproza, 30, naasawaan; Gideon Daproza, 22, baro; Edgar Cruz, 43, naasawaan; ken ni Cherry Daproza, 31, naasawaan, ket nakumpiska kadakuada ti motorized banca, compressor nga adda motorna, improvised a pana, flashlight, ken 20 kilos a nadumaduma ti klaseda nga ikan.
Napagmulta dagiti mangngalap iti P7,500 sakbay a napalubosanda.
Adda ita iti ikut ti kapitan ti barangay compressor ken bangka.
Iti kallabes, sumagmamanon a mangngalap manipud iti Barangay Lingsat ti tiniliw dagiti polis ti San Esteban gapu iti panagkalapda babaen ti panagusarda iti compressor.#
