7 mannalon, nakimat, 1 natay

MARCOS, Ilocos Norte – Maysa a mannalon ti naireport idi Mayo 1 a natay idinto a nayospital dagiti innem a kakaduana gapu iti pannakakimatda sadiay Barangay Ragas, ditoy nga ili.

Naireport a dead on arrival ni Christopher Martin, residente iti Barangay Santiago, idi maidanon iti Marcos District Hospital gapu iti grabe a kondisionna maigapu iti pannakimatna ken dagiti kakaduana a mannalon.

Segun iti hepe ti polis ditoy nga ili, adda dagiti biktima iti uneg ti kalapaw iti tengnga ti kataltalonan idi kellaat a nagkimat ket ni Martin ti napakaruan kadakuada amin nga agkakadua.

Naammuan a nasayaat metten ti kasasaad dagiti dadduma idinto a sumagmamano kadakuada ti naiyakar iti Mariano Marcos Memorial Hospital and Medical Center iti Batac City.#