7 naabuso nga OFWs, naikkan iti puonan

CABUGAO, Ilocos Sur – Pito a babbai nga overseas Filipino workers a nagbalin a biktima ti pannakaabuso ti naikkan iti pagpuonanda a mangipatakder iti negosioda itay nabiit.

Naipaay kadagiti biktima nga agpapada a taga-Cabugao ti puonan a sag-P10,000.00 tapno adda aramatenda para iti ipasdekda a negosioda.

Kinuna ni Maricel Tindoc, maysa kadagiti naabuso a domestic helper a naggapu iti Singapore, ken taga-Barangay Sabang ditoy nga ili a dakkel a tulong kenkuana ti nasao a kantidad tapno makaipatakder iti bassit a tiendana.

Timmapuak ni Tindoc manipud iti maikadua a kadsaaran ti condo a paggigiananna tapno makalibas iti panagabuso ti amona a puon ti nakadangranan ti durina ket nupay naopera iti ospital, naka-wheel chair a simmangpet ditoy pagilian.

Segun ken ni Tindoc, nabayag a saan a makatakder, makabangon, ken makapagna gapu iti pannakadesgrasiana.#