7 paltog, balbala, nakumpiska dagiti polis-La Union iti insayangkatda a search operation

CAMP BGEN OSCAR M FLORENDO – Pito a nadumaduma ti klasena a paltog, magmagasin ken balbala ti nakumpiska dagiti polis iti pagtaengan ti maysa a lakay bayat ti insayangkatda a panagsukisok iti pagtaenganna sadiay Greenville, Barangay Baroro, Bacnotan, La Union idi Mayo 24.

Segun ken ni Police Chief Superintendent Ricardo C. Marquez, Police Regional Office 1 (PRO1) regional director, iti pagtaengan ti maysa nga agnagan Onofre S. Valmonte, 60, ken residente iti nadakamat a barangay, ti nakakumpiskaan dagiti nagtitipon nga elemento dagiti polis kadagiti nadumaduma a paltog, dagiti magasin ken dagiti bala.

Imet dagiti police elements a a nakaibilangan ti La Union Criminal Investigation and Detection Group (LUCIDG), Regional Special Operations Task Group (RSOTG-La Union), Provincial Public Safety Company (PPSC), La Union Provincial Police Office (LUPPO) agraman iti intelligence ken investigation division, ken ti Bacnotan police ti search warrant nga inyisio ni Judge Jeovanie C. Ordono ti Municipal Trial Court of Bacnotan idi insayangkatda ti panagsukisok iti balay ni Valmonte.

Nakumpiska iti balay ni Valmonte ti dua a cal. 45 pistols, 2 a cal. 38 revolvers, maysa a Luger cal. 9MM sub-machine gun, maysa a cal. 45 sub-machine gune, maysa a home made magnum cal. 22 pistol ken assorted a magazine assemblies, balbala.

Mismo a ti suspek ti nangsaksi iti panagsukisok dagiti polis a pakairamanan ti dua a konsehal ti nasao a barangay.

Naikustodia ti suspek ken dagiti nakumpiska iti pagtaenganna iti CIDG ti La Union para iti umisu a disposision idinto a naiyendorso ti kaso iti Opisina ti provincial prosecutor, San Fernando City, La Union.

Daytoy ti maikadua a gundaway a nakasamsam dagiti polis iti dakkel a bilang dagiti armas iti bulan ti Mayo.

Idi Mayo 13, nakakumpiska dagiti nagtitipon a police elements kadagiti nadumaduma a paltog ken balbala manipud iti uppat a behikulo sadiay Barangay Paagan, Santol, La Union.

Kinuna ni Police Senior Superintendent Ramon L. Rafael, La Union police director, nga idi agarup 1:00 ti bigat ti Mayo 13, nagresponde ti Quick Reaction Team (QRT) ti Regional Public Safety Battalion 1 (RPSB1) a nakabase iti Barangay Nagleddegan, Balaoan kalpasan a nakaawatda iti complaint iti kaadda dagiti armado a tattao iti Barangay Pagaan.

Kinuna ni Rafael nga idi makaasideg ti QRT iti nadakamat a lugar, tallo a suspetsado a lallaki ti nangpanaw a nakalukat ti maysa a Hyundai Grace Van. Kalpasan ti panagsukimat dagiti polis iti nadakamat a lugan babaen ti flashlight, dagus a kinordonda ti lugar.

Apaman a nakaalada iti search warrants, naggigiddan nga inyimplementar dagitoy dagiti nagtitipon nga elemento ti Regional Special Operations Task Group (RSOTG) La Union nga indauluan ni PSSupt. Reynaldo G. Biay a nakaibilangan ti La Union  Criminal Investigation and Detection Group (CIDG), PNP Legal Service, Regional Intelligence Division (RID), Provincial Investigation and Detection Management Branch (PIDMB), RPHU1, RIU, RPSB1 ken Santol Police Station a nagtungpal iti pannakakumpiska ti maysa a colt M16 armalite rifle, baby armalite rifle, 30mm carbine rifle ken nadumaduma a  magazine assemblies ken ammunition.

Kanaig daytoy, kinuna ti regional director nga agtultuloy ti implementasion dagiti operasion ti PNP mainaig iti CIDG Flageship Project “Paglalansag Omega” maikontra kadagiti Partisan Armed Groups (PAGs) ken gun ban violators agingga iti gibus ti election period inton June 12, 2013.

Binallaagan pay ni Marquez dagiti dadduma pay a PAGs ken agsalsalungasing iti gun ban a saan pay a natiliw ti isusukoda iti polis.#