7 tattao nasaklangan iti kaso a panagtakaw

SINAIT, Ilocos Sur – Pito a tattao a pakairamanan ti dua a menor de edad ti nasaklangan iti kaso a panagtakaw iti maysa a puesto iti Sinait public market a nakapukawan iti kuarta ken gamit ti maysa a negosiante a babai idi bigat ti Septiembre 10.

Naiyendorso ti kaso a theft iti prosecutor’s office, Vigan City maikontra kada Michael Fuentes y Lauron, 17, residente iti Brgy 44, 245 Mabuhay St. Zone III, District 1 Tondo, Manila; Emiliano Villjarez Jr., y Valendez, 56, residente iti #572, Road 10, Mabuhay Street, Tondo, Manila; Janneth Bautista, Mary Jane Bautista, ken Bobot Bautista, aka Bilog Bautista, agpapada a residente iti Brgy Kagitingan, Tondo, Manila, ken dua a di nainaganan a menor de edad.

Idi agarup 10:00 ti bigat ti Septiembre 10, tinakaw ti dua a menor de edad ti bag ni Delia Ramos y Villanueva, 49, residente iti Barangay Pug-os, Sinait, a naglaon iti P2,000.00, anteohos, ken notebook ngem natiliw dagitoy bayat ti panaglibasda babaen dagiti immarayat nga umili ket naipaimada kadagiti nagresponde a polis.

Mapapati a karaman dagitoy iti grupo dagiti nasaklangan a suspek.#