VIGAN CITY – Pito a waitress nga agserserbi iti paggiinoman ti tiniliw dagiti polis iti rabii ti Hunio 12 gapu iti panaglabsingda iti paglintegan ditoy siudad.

Nasukalan nga awan ti ID dagitoy a babbai ken health permitda a panaglabsing iti city ordinance ditoy.

Natiliw dagiti pito a babbai iti operasion nga inwayat ti SWAT team nga indauluan ni Police Chief Inspector Maximo Taclas, hepe ti polis ditoy, kadagiti nadumaduma a videoke bars iti siudad.

Agtrabtrabaho dagiti di nainaganan a babbai iti videoke bars a masarakan iti Liberation Boulevard, iti public market annex ken iti Jose Singson Street.

Napagmulta dagiti waitress iti sag-P100 ken ti videoke bars a pagpapaayanda.#