70 porsiento laeng nabutosan a kandidato, nagisubmite iti SOCE

DAGUPAN CITY – Linagidaw ti maysa nga opisial ti Commission on Elections a 70 porsiento laeng kadagiti nabutosan a kandidato iti probinsia ti Pangasinan ti nagidatag iti Statement of Contributions and Expenditures (SOCE) idi Nobiembre 27, deadline iti panagipila dagitoy kadagiti nabusbosda iti barangay elections idi Oktubre 28 daytoy a tawen.

Segun ken ni Provincial Election Supervisor, Atty. Marino Salas, kas maibatay iti paglintegan ti Comelec, asinoman a nangabak a kandidato a saan a nakaidatag iti SOCE idi Nobiembre 7 ket saan a makapagtugaw iti puestona.

Innayonna a rason ti pannakadiskualipikana kadagiti sumaruno nga eleksion ti naabak a kandidato no nagpalta a nagisubmite iti SOCE iti mamindua a daras.

Naammuan nga iti intero a probinsia ti Pangasinan, agdagup iti 13,000 ti nagipila iti kandidaturada iti nadumaduma a posision idi Oktubre.

Iti met Dagupan City, agdagup laeng iti 633 manipud iti 921 a kandidato iti barangay elections ti nagidatag iti SOCE.

Kinuna ni Salas a rumbeng laeng nga agtungpal dagiti kandidato iti paglintegan agsipud ta naipalawag daytoy kadakuada sakbay a nagipilada iti sertipiko ti kandidaturada.

Mapapati nga adda dagiti sumagmamano a kandidato a nagipila iti SOCE ti nagkurang iti kasapulan a bilang ti kopia ken saan a nagipresentar kadagiti umisu a resibo. (Manipud iti report ni Venus H. Sarmiento, PIA 1, Pangasinan)