Footer

7,000 deboto timmabuno iti Rambak Kristo Ari

CERVANTES, Ilocos Sur- “Ti kinatan-ok ket saan a makita iti no ania ti naikawes wenno adda kenka, makita daytoy iti no asinoka”.

Daytoy ti bugas ti sermon ni Msgr. William Antonio, vicar general ti Archdiocese ti Nueva Segovia iti sanguanan ti aganay pito ribu a dimmar-ay ti Rambak Kristo Ari 2010 a sinangaili ti parokia ni Sto Niño de Prague itoy nga ili idi Nobiembre 21.

Impaganetget ni Msgr. Antonio ti inaramid ni Jesus a panagpakumbaba iti laksid nga inlansada iti krus ken linalais dagiti pangpanguluen  ken ti maysa kadagiti kriminal a  padana a nailansa iti krus ti kinaarina. Ngem binigbig  ti sabali pay a kriminal a nailansa iti krus daytoy a kinapakumbabana ket dagus a nagpakawan iti basbasolna.

“Kaaduan kadatayo ti agpampannuray iti no ania ti makitatayo iti pada a tao. No nabileg, napno iti alahas bigbigentayo. Ngem no daytoy ket simple laeng, awan naikawes kenkuana a bileg, saantayo nga ikabkabilangan. Aminentayo iti bagitayo, kaayatantayo nga iparammag ti saadtayo iti gimong. Ti nasken a maamiristayo, tuladentayo ti inaramid ni Jesus tapno mabigbigtayo ti kaadda ti Dios iti dennatayo,” kinuna ti parochial vicar.

Maangay ti sumaruno a rambak Kristo Ari iti Sto. Domingo inton umay a tawen.

Kabayatanna, iti eksklusibo a pannakiuman ti Around Ilocandia Channel ken ni Mayor Benjamin Maggay, kinunana a maysa a naisangsangayan a pagteng ti Rambak Kristo Ari para iti  ilida gapu ta maminsan laeng a maangay daytoy iti uneg ti tallopulo ket uppat a tawen (agrikus ngamin iti uppat a pulo a parokia iti probinsia).

“Napintas met daytoy a wagas tapno makita dagiti dimmar-ay ti aglemlemmeng a kinapintas ti ilimi nga adda iti nagbabaetan dagiti bantay,” kinuna ni Maggay.#