700,000 bunubon naibunong para iti pannakapaberde ti Ilocos Sur, La Union

CANDON CITY – Nasurok a 700,000 seedlings ti nadumaduma a forest ken fruit bearing trees ti inwaras ti Tanim Kalikasan, Inc. iti probinsia ti Ilocos Sur ken La Union iti daytoy a tawen, segun iti pannakabagi daytoy non-government organization a tumultulong para iti pannakalapped ti climate change.

Iti interbio ti DZTP Radyo ken ni Jay Lim, pannakabagi ti Tanim Kalikasan, impalgakna a nasurok a 500,000 dagiti bunubon a naiwaras kadagiti nadumaduma nga ili ken barangay iti Ilocos Sur ken nasurok a 200,000 a bunubon ti naibunong iti La Union.

Kinuna ni Lim nga iti pakabuklan,  addan P1.2 milion a naiwarasda a seedlings iti las-ud ti tallo a tawen manipud idi 2009.

Malaksid iti gmelina ken mahogany, adda sagat, narra, kamagong ken dadduma pay a native a kaykayo nga inwarasda a libre kadagiti nadumaduma a lugar ditoy Ilocos Sur, kinuna ni Lim.

Maysa nga NGO ti Tanim Kalikasan a gagemna ti  pannakaisubli ti sigud a kinaberde dagiti kabakiran babaen ti panagmulmula iti kayo tapno mapengdan ti kumarkaro a panagbara ti lubong maigapu iti panagbaliw ti tiempo.

Kabayatanna, saan a kas kadagiti napalabas a tawen, simple laeng ti pannakaselebrar ti Piesta ti Kabambantayan idi Hunio 30.

Kinuna ni Palacapac Barangay Captain David Wagayen, bassit laengen a grupo ti nagmula  iti seedlings ti gmelina ken mahogany, saan a kas iti napalabas a ribu dagiti nakipartisipar iti tree planting activity kas panangselebrar iti Piesta ti Kabambantayan.

Linagidaw ni Wagayen ti napasamak iti kallabes a gapu iti kaadu dagiti nakipartisipar, adu dagiti nadadael a siguden a naimula ken nakaungaren a kaykayo gapu ta nabadbaddekanda, kasta met a saan a nasayaat ti resulta ti panagmula dagiti kayo agsipud ta uray sadino lattan ti nagmulaan dagiti partisipante.

Kas paset ti pannakaselebrar ti Piesta ti Kabambantayan, tinawen nga agmula dagiti bumarangay iti watershed area ti siudad a sakup ti Barangay Palacapac ken San Andres kadagiti kaykayo a pakaibilangan ti gmelina, mangga, narra ken dadduma a dadakkel a kayo.

Namnamaen dagiti opisial ditoy a maysanto a tourist destination daytoy a paset ti kabambantayan no agbunga amin a kaykayo a naimula.#