722 polis, nawarasan iti baro a paltog

CAMP BGEN OSCAR M FLORENDO – Pito gasut duapulo ket dua a polis ti immawat iti baro a paltog bayat iti simple a programa a naangay iti Police Provincial Police ditoy idi Oktubre 18.

Mismo a ni Region 1 Police Director Chief Superintendent Ricardo Marquez ti nagiwaras kadagiti baro a 9mm Glock 17 Generation 4 pistols kadagiti 722 a polis nga awan pay ti nayisio a paltog kadakuada ken nakapasa iti panagsanay mainaig iti daytoy a klase ti paltog nga insayangkat ti PNP Regional Special Training Unit 1 (RSTU1).

Kinuna ni Marquez nga umuna a tranche daytoy a paltog  a naiwaras kadagiti police patrollers a naka-assigned iti  uppat a probinsia iti Region 1. Agdagup iti 66 ti naiwaras iti Ilocos Norte Provincial Police Office, 113 iti Ilocos Sur PPO, 144 iti La Union PPO, ken 399 iti Pangasinan PPO.

Kumpleto a set tunggal unit ket addaan daytoy iti dua nga spare magazines, cleaning kit user’s manual, carrying case, 28 rounds a bala.

Kinuna ni Marquez nga iti kaaddan iti paltog dagiti polis, mapapigsa ti PRO1 iti pagrebbenganna mainaig iti pannakaipakat iti linteg  ken  panangidur-as iti implementasion ti Patrol 101.

“Nasaysayaat itan ti panangipaay dagiti agpatrolia iti serbisio ken pannalaknib iti komunidad,” kinuna ni Marquez.

Kinuna ti regional director a prioridad a nawarasan iti baro a paltog dagiti addaan iti ranggo a police officers 1 agingga iti 3 iti babaen ti Capability Enhancement Program ti PNP kas mainaig iti CODE-P program a naipokus iti kinasiglaat ken kabaelan.

Malaksid kadagiti naiwaras a paltog, adda pay nakasaganan a mairuar iti PNP Headquarters a kanayonan a 1,315 a paltog tapno makumleto ti quota ti PRO1 a 2,037, kas paset ti 74,879 a paltog a ginatang ti PNP a nairanta a mangsupusop iti kasapulan nga armas ti kapolisan.

Segun ken ni Marquez, addaan ti Glock 17 iti market price a P40,940 tunggal unit ngem babaen ti transparente a proseso ti bidding, nagatang laeng ti paltog iti P16,659.94 tunggal unit ket nakainut ti PNP iti P200,082,954.24 manipud iti orihinal a P1.198 bilion nga alokasion a  naaramat  iti pannakagatang ti kanayonan a 15,000 iti isu met laeng a brand a pistol.

Ar-aramaten ti 60 porsiento kadagiti police forces ken  dadduma a law enforcement agencies iti Europe, United States of America ken Asia daytoy a klase ti paltog.

Kabayatanna, agdagup iti 1,425 a paris ti sapatos a pagpatrolia ti naiwaras kadagiti police patrollers nga aramatenda bayat ti panagpatroliada.

Manipud iti 5,366 MI16 ammunitions, naiwaras ti 22,484 iti Provincial Public Safety Company (PPSC) iti Ilocos Norte, Ilocos Sur, La Union ken Pangasinan, idinto nga agdagup iti 5,904 ti naibunong iti 4 a Police Provincial Offices  (PPOs), ken 6,978 para Regional Public Safety Battalion 1 (RPSB1).

Manipud iti 495 MI6 magazines, agpaparis ti bilang nga inawat dagiti PPOs idinto a 71 M16 magazines ti naited iti RPBS1.#