723 dagiti biktima ti dengue iti Ilocos Sur; 2 ti natay

VIGAN CITY – Agdagup iti 723 dagiti biktima ti dengue iti Ilocos Sur ken duan dagiti natay manipud Enero 1 agingga idi Hulio 9, 2019, ket kasapulan ti panagkaykaysa nga agtignay ti Provincial Government, lokal a gobierno, dagiti nagduduma nga ahensia ti nasional a gobierno ket pribado a tattao tapno saanen nga umadu pay dagiti biktima ken awanen ti uray maysa a matay gapu iti daytoy a sakit.

Dayta ti nairakurak ken nakiddaw kabayatan ti press conference kalpasan ti emergency meeting nga indauluan ni Governor Ryan Singson ken Ilocos Sur Provincial Hospital Director Dr. Trina Talaga Tabboga, ken inatenderan dagiti chief of district hospital, medical officers ken local chief executives dagiti ili ken siudad nga addaan iti adu kaso ti dengue. Naangay ti emergency meeting ken press conference iti Office of the Governor, Provincial Capitol.

Naipakaammo iti komperensia a dumanon iti 95.40% ti immaduan iti bilang dagiti biktima ita a tawen no maikompara iti 370 a kadagupan dagiti biktima idi napalabas a tawen manipud Enero – Hulio, 2018. Iti kadagupan dagiti natay a biktima ti dengue, maysa ti taga-Sta. Cruz ken maysa ti taga-Del Pilar. Nairakurak nga iti laksid dagiti maisaysayangkat nga anti-dengue prevention operations kas ti panag-spray ti kemikal ken panagpaasuk kadagiti lugar a pagum-umokan iti lamok ket nagbalinen a chemical-resistant dagiti dadduma a klase ti babai nga Aedes aegypti a lamok nga agkagat ken agiwaras iti virus a makaigapu ti sakit a dengue.

β€œAwan ti dengue outbreak iti Ilocos Sur, ngem makaalarma ti kaadu ti bilang dagiti biktima ket tapno saanen nga umadu dagiti kaso ti dengue ken awanen iti uray maysa a maisakripisio a biag ket immawagak iti miting tapno pagpapatanganmi no kasano a solbarenmi daytoy a problema,” kinuna ni Gov. Singson kabayatan ti naangay a press conference kalpasan ti miting, ken panangipasingkedna ti panangipaay ti Provincial Government iti tulong kadagiti public hospitals ken local government units.

Impatalged ti Gobernador a madadaan ti Provincial Government a mangipaay iti kasapulan a tulong kadagiti LGU tapno malapdan ti dengue iti Ilocos Sur. Impasingkedna nga adda dagiti itedda a kemikal ken ipabulodda nga alikamen para iti fogging and misting operations.

Kiniddaw met ni Dr. Tabboga kadagiti local chief executives, municipal and city medical officers ken barangay officials iti tulongda iti pannakaisayangkat kadagiti masakupanda dagiti anti-dengue operations. Nagapila met kadagiti umili iti pannakikaysada tapno malapdan ti panagraira ti dengue babaen ti regular a panagdaldalusda kadagiti pagtaengan ken paraanganda.

Inrakurak pay ni Dr. Tabboga ti kaaddan iti blood bank iti Gabriela Silang General Hospital kadagiti umili nga ikagumaanda iti agidonar iti darada iti GSGH blood bank tapno adda madadaan nga usarenda wenno dagiti kameng ti pamiliada.

Dagiti 10 nga ili ken siudad iti Ilocos Sur a kaaduan iti kaso ti dengue: Sta Cruz – 135, San Juan – 70; Cabugao – 62; Candon City – 58; Magsingal – 50; Vigan City – 41; Sto. Domingo – 34; Tagudin – 30; San Esteban – 28; ken Caoayan – 24.