76 pamilia iti 3 barangay ti Santa, naibakuit gapu iti storm surge

SANTA, Ilocos Sur – Agdagup iti 76 a pamilia a residente iti tallo a barangay ditoy nga ili ti imbakuit ti municipal government  agsipud iti kellaat a panagdinakkel ti danum idi rabii ti Septiembre 28.

Naibakuit ti 17 a pamilia nga agnaed iti Barangay Tabucolan, 6 a pamilia iti Barangay Pasungol ken 53 a pamilia manipud iti Barangay Bucalag iti evacuation center iti poblacion gapu iti storm surge a pinataud ni Bagyo Pedring.

Nagkikinnamayet ti gobierno munisipal, Philippine Army, PNP ken DWSD iti pannakaibakuit dagiti residente iti munisipio ditoy

Immun-una a naireport nga uppat a pagtaengan ti naduprak iti coastal barangays daytoy nga ili gapu iti storm surge a pinataud ti Bagyo Pedring.

Sakbayna, imbilin ni Gov. Luis “Chavit’ Singson ti pannakaibakuit amin nga agnaed kadagiti coastal barangays ditoy nga ili kalpasan ti pannakapaliiw iti nadaras a panagdinakkel ti danum gapuen iti Bagyo Pedring.

Tallo a truck ti nangibakuit kadagiti lumugar iti munisipio ken nawarasan iti relief goods.

Kabayatanna, nagdisnudo dagiti lumugar iti Sitio Mindanao, Barangay Paratong, Santa Catalina a nagbakuit idi agarup alas nuebe ti rabii ti Septiembre 28 gapu iti amakda a malayusda maigapu iti panagatab ti baybay.

Naipan dagiti lumugar iti munisipio ditoy nga ili tapno palabsenda ti rabii.

Indauluan ni Mayor Carlos Asuncion dagiti timmulong iti pannakaibakuit dagiti 11 a nga agnaed iti nadakamat a lugar.

Iti sabali a damag, naibakuit dagiti lumugar iti Barangay Poro, Caoayan iti natengtengnga a paset ti barangay gapu iti storm surge.

Iti met Barangay Fuerte, nagboluntario a nagbakuit ti dua a pamilia iti amakda a maiyanud ti pagtaenganda agsipud ta ginuyoden ti danum dagiti sandbags a pannakasalaknibda.

Iti Barangay Apatot, San Esteban, inreport ni Barangay Captain Nestor Eligio a 10 a balay ti partially damaged ken naibakuit dagiti agnaed iti eskuela gapu iti storm surge.

Walo a kalapaw ti maireport a nadadael iti Barangay Ambucao, Santiago, Ilocos Sur idinto nga adda paset ti seawall a dinadael ti napigsa a dalluyon ket pinullatan dagiti lumugar kadagiti sandbags.

Naammuan met ken ni Gabao Barangay Captain Ruben Elefante a dua a balay ti nadadael, maysa a bilog ti nawara ken sumagmamano a kalapaw ti nayanud iti barangayda gapu iti nagdinakkel a danum.

Iti Darapidap ken Caterman Candon City, insigida a nagiwaras dagiti opisial iti relief goods kadagiti naapektaran a nga umili a sinalpa ti danum ti pagtaenganda.#