8 a suspek a nanglugob iti kalugaranda, nakasuan iti murder

VIGAN CITY – Nasaklangan iti kaso dagiti walo a lallaki a nanglugob iti maysa a kalugaranna iti Barangay Anonang, Caoayan idi rabii ti Hunio 23.

Napilaan iti kaso a murder iti pannakatay ni Rodel Rafal y Quiba, 37, naasawaan, ken residente iti nadakamat a barangay da Van Anthony Tugade y Quiba, 19, baro; Daryl Quitoriano y Alejo, 20, baro; Robin Lazo Famorca, 18, baro; Johnny Martinez y Sablot, 26, baro;  Eddie Tugade y Quiba, 29, baro; Harold Arabe y Atanacio, 20, baro; Ryan Quitoriano y Alejo, 19, baro; agpapada a residente met laeng iti nadakamat a barangay; ken ni Jay Taala y Alvarez, 26, naasawaan, ken residente iti Barangay Tamurong, Caoayan.

Pimmusay ti biktima iti Gabriela Silang General Hospital sumagmamano nga oras kalpasan a naitaray ditoy maigapu iti nakaro a pannakabugbogna ken dunor iti mugingna a mapapati a gapuanan ti bato.

Iti interbiona iti DWRS, kinuna ni Jomar, 15, maysa nga anak ti biktima, a nakitana a “naggaaduan” dagiti suspek a a kinabil ti amana.

Kinunana nga adda iggem a bato dagiti nanglugob iti amana.

Nupay kasta, nakunana a dina nailasin dagiti nanglugob kenkuana ta adayo ti yanna.

Kinunana a saan nga immas-asideg ta mabuteng amangan no iraman dagiti nangkabil ken ni amana.

Kinuna met  ni Mirasol,  asawa ti biktima, a nakadasayen ti lakayna idi mapanda itaray iti Gabriela Silang General Hospital iti dayta met laeng a rabii.

Segun ken ni Mirasol, inagal ti asawana ti ulo ken lapayagna bayat ti kaaddana iti ospital.

Imballakad ti doktor a nangtaming kenkuana a maitaray iti ospital iti La Union ngem saan a pinatuloy ti pamiliana gapu iti kaawan ti gastuenda iti operasion.

Pimmusay ni Rafal iti ospital iti malem ti Domingo.

Segun iti panagimbestiga dagiti polis, kasangsangpet ti biktima a nakalugan iti motorsiklona idi mapapati nga adda naglaaw manipud iti grupo dagiti suspek.

Mapapati a nakarurod ti biktima ket nangala ti screwdriver manipud motorsiklona sana kinompronta ti grupo a nagtungpal iti mapapati a pananglugobda kenkuana.#