8 biktima iti paputok iti panangsarabo iti baro a tawen

CABUGAO, Ilocos Sur – Walo a tattao a pakairamanan ti uppat nga ubing manipud iti uppat nga ili iti probinsia ti inisial a naireport a nagbalin a biktima ti paputok idi agpakada ti tawen 2015 ken sumagmamano a minutos kalpasan ti isasangbay ti 2016.

Iti Cabugao, naireport idi agarup 8:00 ti agsapa ti Disiembre 31 a naiyospital iti Suero General Hospital ni Lindley Josh Agleam y Maranan, 9, Grade V pupil, ken residente iti Brgy Carusipan, Cabugao, Ilocos Sur gapu ta nabtakan dagiti ramayna iti paputok.

Mapapati a bimtak ti piccolo iti ramay ni Agleam sakbay a maipalladawna daytoy a puon ti pannakadunorna.

Iti met report manipud iti Vigan City police station, nadunor ni John Lloyd Pimentel Cayabyab, 8, residente iti Barangay Bongtolan, gapu ta nabtakan iti three star triangle a paputok ti makannigid nga index fingerna.

Napasamak daytoy idi agarup 1:50 ti malem ti Disiembre 31.

Sadiay Santa, inreport ni Barangay Kagawad Crisanto Benavideza iti polis a biktima iti bimtak a baby rocket da Wayne Bajet y Ocampo, 14, ken John Carlo Catubay y Laberindo, 13, agpada a residente iti  Barangay Sacuyya Sur.

Iti panagimbestiga dagiti nagresponde a polis,  magmagna dagiti biktima iti sango ti barangay plaza idi agarup 9:50 ti rabii ti Disiembre 31 idi pinasgedan ti kasinsinda ti maysa a baby rocket ket timmayab sa bimtak daytoy iti asideg dagiti biktima a nagresulta iti pannakasugat ti sakada.

Naipan dagiti biktima iti Central Ilocos Sur District Hospital para iti pannakaagasda ngem rimmuarda met laeng kalpasanna.

Kellaat a bimtak ti five star a paputok nga iggem ni Aries Baptista y Fetalvero, 20, baro ken residente iti Sitio Turod, Barangay Panay Sur, Magsingal, Ilocos Sur a puon iti nakasugatan ti makannigid a dakulapna.

Segun iti rekord ti police station ti Magsingal, napasamak daytoy idi agarup 2:20 ti malem ti Disiembre 31 iti mismo a balay ti biktima.

Naitaray ni Baptista iti Tolentino Clinic and Hospital iti Sto. Domingo, Ilocos Sur, ngem rimmuar met laeng iti dayta a rabii.

Kabayatanna, idi agarup 1:45 ti agsapa ti Enero 1, 2016, dua nga ubing ti naitaray iti ospital sadiay Pira Clinic and Hospital gapu ta napuntaanda iti kuitis.

Mismo a ti ama dagiti biktima a ni Alexander Somera y Zabala, 54, naasawaan, negosiante, ken residente iti Barangay Baclig, Cabugao, Ilocos Sur, ti nangitaray kada Derik James Somera y Ramos, 4, prep school pupil iti UCCP Cabugao, Ilocos Sur ken John Martin Somera y Ramos, 3, agpada a residente iti Barangay Baclig, Cabugao, Ilocos Sur, iti nadakamat nga ospital gapu kadagiti sugatda.

Segun iti report, agbuybuya dagiti aggaama iti fireworks manipud iti balay ni Mercy Villamor iti Brgy Turod, Cabugao, Ilocos Sur, idi natinnag ti barut a nagbitinan dagiti kuitis a puon ti panagsisina ti tinurong dagiti agbettak a kuitis ket maysa ti bimtak iti asideg ti pagbuybuyaan dagiti biktima.

Nasilaban ti agpada a takiag ken  makannigid nga abaga ni Derick James  idinto a nasilaban met ti likud ti makannigid a lapayag ni John Martin.

Kabayatanna, lima a minutos laeng kalpasan ti isasangbay ti baro a tawen, minalas ti maysa a reveller agsipud ta natinnagan iti paputok a puon ti pannakadunor ken pannakaiyospitalna.

Naitaray iti Gabriela Silang General Hospital ni Nick Villegas y Gorospe, 35, naasawaan ken residente iti Brgy Bonifacio, Cabugao, Ilocos Sur gapu ta natinnagan iti bimtak a paputok ti bukotna bayat ti panagbuyana iti fireworks iti sanguanan ti provincial capitol ditoy Vigan City.

Nupay kasta, napagawid met laeng ni Villegas kalpasan ti pannakaagasna. (Tawid News Team)