8 naaresto gapu iti illegal logging

TAGUDIN, Ilocos Sur – Walo a lallaki ti tiniliw dagiti polis gapu iti panagpukanda iti narra iti kabambantayan a paset ti Barangay Baracbac, ditoy nga ili idi malem ti Marso 15.

Nagresponde dagiti polis kalpasan a nakaawatda iti report manipud ken ni Baracbac Barangay Captain Romeo Aguilar nga adda agiwaywayat iti illegal logging iti kabambantayan a paset ti barangayda.

Kinuyog ni Aguilar ken dua a tanodna dagiti polis a nagturong iti nadakamat a lugar tapno penkenda no pudno ti impornasion ket sadiay, walo a lallaki ti nasalamaannda a nagpukan iti narra.

Nainaganan dagiti suspek a da George Lemi y Competenti, 62, naasawaan, ken residente iti Barangay Magsaysay, Tagudin ken dagiti trabahadorna a da Primo Almazan y Desumala, 24, baro; Richard Torres y Callos, 28, naasawaan, chainsaw operator; ken Carlo Almazan, 13, agpapadada amin a residente iti Barangay Baracbac, Tagudin; Mark Garcia, 20, baro; Marcelino Ader y Viduya, 36; Meguel Ader y Viduya, 28, baro; and Cher Ader y Viduya, addaan legal nga edad, naasawaan, residenteda amin iti Barangay Farola, Tagudin, Ilocos Sur.

Awan ti naipresenta dagiti suspek a permit nga agpukanda iti kayo.

Ngem segun ken ni Lemi, natuangen ti narra gapu iti bagyo ket pinarugosna sakbay a madadael daytoy.

Naipan dagiti naaresto iti police station agraman ti chainsaw ken innem a narugos iti nadumaduma a kaatiddog a narra lumber para iti dokomentasion ken umisu a disposion.#