LIDLIDDA, Ilocos Sur. Walo ti nailistan a biktima ti dengue iti tallo a barangay itoy nga ili, daytoy ti naammuan ken ni Dr. Haynedina Pascua, rural health physician.

Segun ken ni Pascua, lima kadagiti nagsakit iti dengue ti naggapu iti Poblacion Norte, 2 iti Bequi ken maysa iti barangay Banucal. Nupay kasta, gapu iti madagdagus a pannakaagasda, awan ti napakaruan kadakuada.

Kinuna ni Pascua a suspetsana a maysa nga ubing iti Poblacion Norte ti nangiyalis iti sakit kadagiti kaarrubana babaen kadagiti lamok a kimmagat kenkuana..

“Nangisayangkatkamin iti information dissemination agraman fogging operation nangruna iti Poblacion Norte,” kinuna ni Pascua.#