8 naipromot a police superintendent

SAN FERNANDO CITY – Walo a police officers ti naipromot a superintendent bayat ti flag raising ceremony a naangay iti PRO1 grandstand idi Agosto 18.

Naipromot a superintendente da Randolph B. Beniat, Leland T. Benigno, John F. Charongen, Joseph Rizaldy A. Dalope, Reynaldo L. Lizardo, Marlon D. Paiste, Roland L. Sacyat ken Medardo O. Soriano.

Naammuan ti Tawid News nga iti kadagupan dagiti naipromot a police commissioned officers (PCOs), innem ti agdama a naka-assigned iti regional headquarters iti PRO1, idinto a saggaysa manipud iti Ilocos Norte Police Provincial Office ken Ilocos Sur PPO.

Kinuna ni PRO1 Regional Director Chief Superintendent Roman A. Felix a pammatalged iti propesional a kabaelan ken naimpusuan a panagtrabaho dagiti PCOs ti pannakaipromotda idinto nga impalagipna kadakuada a naipabaklay iti nangatngato a ranggoda saan laeng a dakdakkel nga otoridad no di pay nadagdagsen a responsibilidad ken disiplina.#