: 8 natay iti panangduprak ni Bagyo Juan iti Rehion Uno; ginasut a tattao, naibakuit iti Ilocos Sur | Tawid News Magazine - Weekly Ilocos News 📰

8 natay iti panangduprak ni Bagyo Juan iti Rehion Uno; ginasut a tattao, naibakuit iti Ilocos Sur

SAN FERNANDO CITY, La Union – Agdagup iti walo dagiti natay idinto a ginasut a pamilia ti naibakuit iti panangsanot ni Bagyo Juan iti rehion one.

Kaadduanna kadagiti natay a biktima ti bagyo ti naireport manipud iti Pangasinan idinto a maysa ti mapapati a nalmes iti Ilocos Sur idi kangitingit ti bagyo.

Nabigbig dagiti natay a da Freddie de Guzman, 33, residente iti Barangay Calomboyan Norte, Mangatarem, Pangasinan a nakimat;  Sherilyn Bactayan, 18, Jurambae Bactayan, 22, ken Bena Tammilapos, 16, agpada a residente iti Tamayo, San Carlos City; C-Jay Ordoñez, agnaed iti Rosales, Pangasinan a nalmes; Ana Vidal, 29, ken ti dua nga annakna a da Oggie, 4, ken Eggie, 2, agpapada nga agnaed iti Barangay Sagud Baley, San Fabian, Pangasinan gapu iti pannakatupak ti balayda iti kayo.

Nabigbig dagiti nasugatan a da Rowena Marcos, residente iti Bolinao, Pangasinan, Lopez Sobredilla, 41, residente iti Barangay Ili Norte, San Juan, La Union, ken Sefiro Flores, 61, residente iti Barangay Bungro, San Fernando City.

Kabayatanna, 100 a pamilia ti naireport a nalakon iti maysa a barangay iti Manaoag, Santa Barbara, Calasiao ken San Jacinto iti probinsia ti Pangasinan gapu iti pannakalayusda maigapu iti nagtultuloy a napigsa a tudo.

Naideklara metten nga adda iti estado ti kalamidad ti Bauang, La Union gapu iti sinagrapna a didigra iti dimmuprak a bagyo.

Naireport a nalmes ni Jeff Joshua Duque, 27, residente iti Barangay Oaig Daya, Galimuyod ket narekobre ti bangkayna a naisadsad iti Darapidap Beach iti Barangay Darapidap, Candon City. Nupay kasta, saan pay a nakumpirma ti kinaagpaysona agsipud ta awan ti report a dimmanon iti provincial disaster risk reduction and management council.

Naireport ketdi a natay gapu iti pannakaatakena ni Ilocos Sur chief forecaster Eddie Quitevis iti agsapa ti Oktubre 18 sakbay a dinuprak ti bagyo ti probinsia.

Natumba ti maysa a poste ti koriente iti Barangay Taguiporo, Bantay, Ilocos Sur.

Nagpukaw ti koriente iti sapasap nga Ilocos Sur nangrugi iti alas kuatro ti malem ti Oktubre 18.

Impakaammo ni Clarence Ducusin ti ISECO a pinaayabanda amin a linemen ti kooperatiba tapno matarimaan dagiti nadadael a linia para iti madagdagus a pannakaisubli ti elektrisidad ti probinsia.

Naisubli met laeng ti silaw iti Vigan City maysa nga aldaw kalpasanna. Nupay kasta, adda pay dagiti dadduma a lugar a di pay nagsilaw gapu iti agtultuloy a napigsa nga angin ken maiballaballaet a napigsa a tudo.

Saan a napigsa a tudo no di napigsa nga angin ti napasaran iti Ilocos Sur iti ilalabas ni Bagyo Juan idi rabii ti Oktubre 18 ngem adu a pamilia ti nagbakuit gapu iti amakda iti panagdinakkel ti kabaybayan.

Segun iti report, umabot iti 500 a tattao ti naibakuit manipud dagiti coastal barangays ti ili a Caoayan, Sto. Domingo, Santa, Magsingal, Candon City ken dadduma pay a nababa a barangay iti probinsia.

Iti report ti COP ti Sto. Domingo, idi agarup alas sais ti malem ti Oktubre 19, 25 a pamilia a buklen ti 91 a tattao ken 13 a pamilia a buklen ti 62 a tattao manipud iti Barangay Poro ken Barangay Alangan Magsingal ti naibakuit  ket naipanda iti Sto. Domingo People’s Coliseum.

Nupay kasta, kalpasan ti pammigat, nagsublida met laeng iti pagtaenganda.

Dua met a pamilia wenno 12 a tattao ti naibakuit a residente ti Barangay Talogtog, Candon City iti pagadalan elementaria;  39 a pamilia manipud iti Barangay Uribi, Dammay, Pasungol, Tabucolan ken Bucalag, Santa ti naibakuit iti gymnasium ti ili, rural health unit, idinto a napan nagpaing dagiti dadduma iti pagtaengan dagiti kakabagianda; dua a pamilia ti naipakni iti nataltalged a lugar manipud iti Sitio Mindanao, Barangay Paratong, Sta. Catalina; 46 a pamilia a buklen ti 136 a tattao ti naibakuit iti Sta. Cruz; ken 41 a pamilia ti naibakuit iti Caoayan.

Kabayatanna, nagpatnag iti city hall a minonitor dagiti opisial ti Vigan City iti panangidaulo ni Mayor Eva Marie Singson Medina ken ni Vice Mayor Ryan Singson iti direksion ni Bagyo Juan sakbay iti landfall iti idinto a nakasaganan dagiti maseknan nga ahensia iti rescue operation no adda maireport a makasapul iti tulong nangruna dagiti nababa a lugar ken dagiti coastal barangays ti siudad.#

Enhanced by Zemanta