8 nga ili, naikkan iti Seal of Good Housekeeping

VIGAN CITY – Inyawat ti Department of Interior and Local Government ditoy probinsia ti Seal of Good Housekeping kadagiti walo a munisipalidad kas pammigbigna iti programada iti good governance.

Inyawat ni DILG Provincial Director Victoria Ramos ti nasao a pammadayaw iti walo nga ili a pakaibilangan ti Bantay, Cabugao, Sta. Maria, Narvacan, San Juan, Sto. Domingo, Tagudin ken Sinait kas pammigbig a nakapasa dagitoy iti programa ti DILG mainaig iti kinaurnos ti panangimaton dagiti agtuturayda iti lokal a gobiernoda.

Kabayatanna, impresentar ni Ramos ti maysa a plano para iti pannakakissay ti maisayangkat a krimen ken pannakaingato ti pannakasolbar dagitoy.

Impresentar ni  Ramos ti Provincial Peace and Order and Public Safety Plan 2012-2016 a nakaipalaonan dagiti addang tapno maksayan ti crime rate, maingato ti crime solution efficiency, masustener ti implementasion dagiti linteg, mapukaw ti insurhensia, mapapigsa ti barangay justice system, maksayan ti maibalud, maawan ti maapektaran iti tiempo ti kalamidad, maprotektaran ti aglawlaw ken dadduma pay. #