8 police officers, napadayawan iti pannakaselebrar ti 110th Police Service Anniversary

BANTAY, Ilocos Sur –  Walo a police officers ti pinadayawan ti provincial police office iti pannakaselebrarna ti 110th Police Service Anniversary a naangay iti Camp Pres. Elpidio Quirino ditoy nga ili idi Agosto 19.

Karaman kadagiti napadayawan da Police Supt. Marlowe Castillo, Best Senior Police Commissioned Officer of the Year-Administration; Police Supt. Panfilo Racho, Best Senior Police Commissioned Officer of the Year-Operation; Police Chief Inspector Joseph Fajardo, Jr., Best Junior Police Commissioned Officer of the Year; Senior Police Officer 4 (SPO4) Rogelio Davalos, Best Senior Police Non-Commissioned Officer of the Year; SPO1 Amado Somera, Jr., Best Junior Police Non-Commissioned Officer of the Year; SPO2 Mary Rose Ascaño, Best Policewoman of the Year; Rolando Sahagon, Best Non-Uniformed Personnel of the Year,

Naited met ti Achievement Award ken ni Police Supt. Emmanuel Reyes, Company Commander ti Ilocos Sur Police Safety Company.

Napili ti Vigan City Police Station a kasayaatan a kas best police station of the year iti city category.

Napili met ti Narvacan Police Station a kasayaatan iti urban category ken ti San Ildefonso Police Station iti rural category.

Kabayatanna, pito a local chief executives ti pinadayawan ti provincial police office gapu iti pannakitinnulongda iti kapolisan iti pannakatagiben iti urnos ken talna a pakaibilangan da Mayor Severino Galanga ti Banayoyo, Mayor Sammy Parilla ti Bantay, Mayor Edgar Cobangbang, Jr. ti Cabugao, Mayor Edgar Florendo ti Sta. Maria, Mayor Chester Elaydo iti San Esteban, Mayor Carlos Asuncion ti Sta. Catalina, ken Mayor Amado Tadena ti Sto. Domingo.

Naikkan pay iti pammadayaw ni Provincial Administrator Vicky Cu ken ni Vice Mayor Alrico Favis ti Magsingal, Ilocos Sur.#