8 polis, maibaon para tumulong iti seguridad ni Pope Francis

STO. DOMINGO, Ilocos Sur – Walo a polis ditoy nga ili ti karaman a maibaon a mangsaluad iti seguridad ni Pope Francis bayat ti ibibisitana iti pagilian inton Enero 15-19 daytoy a tawen.

Kinuna ni Hepe ti Polis Honesto Lazo, Jr. a walo a polis ti maibaon a reinforcement iti pannakasaluad ti seguridad ni Pope Francis iti Metro Manila, kas kiddaw iti liderato ti PNP.

Kinuna ni Lazo a maiwardas dagiti annongen dagiti mabati a polis tapno matagiben latta ti urnos ken talna iti Sto. Domingo.

Segun ken ni Lazo, addanto latta maibaon a polis iti police assistance center iti Barangay Naglaoaan ket kadduaento ida dagiti kameng ti Bantay Talna.

Uray dagiti dadduma a police stations iti Ilocos Sur ket nakiddaw a mangibaonda iti polis kas augmentation force iti ibibisita ni Pope Francis iti pagilian.

Agdagupto laeng iti 13 dagiti mabati a polis ditoy iti las-ud ti kaadda ni Pope Francis iti pagilian.#