Footer

8 ubbing, nayospital gapu iti dengue

CANDON CITY – Walo nga ubbing ti naiserrek iti ospital iti siudad ti Vigan ken ditoy gapu iti sakit a dengue.

Uppat nga ubbing ti naipadamag a naiserrek iti city hospital ditoy, pasig nga agbasbasa iti elementaria iti San Esteban, Ilocos Sur.

Dua kadakuada ti agtawen iti 9, agpapada a taga-San Pablo, San Esteban, Ilocos Sur, sangapulo bulan laeng ti maysa a pasiente a taga-Villa Quirino, San Esteban, Ilocos Sur, idinto a 12 ti tawen ti ubing a taga San Pablo, ti nasao met laeng nga ili.

Naammuan iti rekord ti ospital a sabali pay nga ubing nga agsakit iti dengue ti naiserrek ditoy ngem nasigudan ket rimmuaren.

Iti sabali a bangir, uppat met nga ubbing ti naiserrek iti Gabriela Silang General Hospital gapu iti nasao a sakit.

Dua kadakuada ti naggapu iti Sta. Maria, Ilocos Sur, agtawenda iti innem ken siam.

Maysa nga ubing a naggapu iti Magsingal, Ilocos Sur ti naadmitar iti GSGH.

Sabali pay nga ubing nga agtawen iti maysa a taga-Vigan City ti naiserrek iti GSGH idi Agosto 1 ngem naimbaganen ket rimmuaren.

Kaadduan a biktima ti dengue dagiti ubbing agsipud ta nakapsut pay laeng ti naturalesada.

Agtaud daytoy a sakit manipud iti lamok nga aedis aegepti.

Kanaig daytoy, masansan nga ipalagip ti Departamento ti Salun-at ti panagdaldalus iti arubayan ken ti Operation Taob, no sadino a maipattog amin a posible a paggianan dagiti lamok kas iti botelia, pilid a goma, basio ti lata, pagikabilan iti sabong ken dadduma pay a banag a pakaurnongan ti danum wenno tudo.

Isaysayangkat met dagiti dadduma a munisipio ti fogging operations no sadino a mapaasukan dagiti pasdek publiko, pagtaengan ken kankanal a posible a paggianan ken pagitlogan dagiti lamok.#