80 youth leaders, makipartisipar iti summer camp

SAN ILDEFONSO – Walopulo a lider dagiti agtutubo ti manamnama a makipartisipar iti summer youth camp a maangay iti campus ti Philippine Science High School inton Mayo 21-22.

Kinuna ni DILG Acting Provincial Director Federico Bitonio a dumar-ay ditoy dagiti lider dagiti agtutubo manipud iti Siudad ti Vigan ken Siudad ti Candon kas paset ti panggep ti DILG a pangawis kadagitoy a tumulong iti kampania mainaig iti epekto ti panagbaliw ti klima.

Nadumaduma nga aktibidad ti maisayangkat bayat ti panagkampo dagiti agtutubo kas iti pasalip iti panagaramidan iti poster, pasalip iti panagputar iti jingle, ken lektiur mainaig iti climate change.

Segun ken ni Bitonio, aniaman a maadal dagiti youth leaders iti panagkampoda, ket iyadaldanto met kadagiti kapatadanda.#