83 estudiante, naikkan trabaho ita a kalgaw

VIGAN CITY – Tapno adda gastusenda iti panaglukat ti klase inton Hunio, 83 nga estudiante ti inikkan ti gobierno ti probinsial nga idadauluan ni Gobernador Ryan Luis Singson ken ti Department of Labor and Employment (DOLE) iti pagsapulan ita a kalgaw.

Nangrugi dagiti estudiante a nagtrabaho idi Abril 13 iti nagduduma nga opisina iti provincial capitol ken iti BaRang-ay Demo Farm sadiay San Juan, Ilocos Sur ket agpaut ti trabahoda iti 30 nga aldaw, segun ken ni Mario Ruelos, hepe ti Public Employment Service Office (PESO) ken Human Resource Management Office (HRMO) ti Kapitolio.
Programa ti DOLE iti babaen ti SPES a mangtulong kadagiti marigrigat nga estudiante tapno makapagtuloyda nga agbasa, maikkanda iti pagtrabahuanda iti kalgaw nga ibaklay ti employer ti 60% idinto a 40% ti ibaklay ti DOLE.

Iti daytoy a panagtrabaho dagiti estudiante kadagiti opisina ti gobierno ti probinsia, agsueldoda iti P200 iti inaldaw, P120 ti aggapu iti gobierno probinsial ken P80.00 manipud iti DOLE.#