83 estudiante, naiyempleo ti gobierno prob’l babaen SPES

VIGAN CITY – Agdagup iti 83 nga estudiante ti naiyempleo ti gobierno probinsial iti babaen ti Special Program for the Employment of Students (SPES), daytoy ti naammuan manipud iti Department of Labor and Employment (DOLE) itay nabiit.

Segun ken ni Mario Ruelos, hepe ti Public Employment Service Office (PESO) nga agtrabtrabaho daytoy a bilang dagiti estudiante iti nadumaduma nga opisina iti provincial capitol, kasta met iti BaRangay Demo Farm iti San Juan, Ilocos Sur.

Innayon ni Ruelos a makabulan nga agtrabaho dagiti estudiante a nangrugi idi Abril 13.

Ti gobierno probinsial ti mangibaklay iti P180.00 idinto a P80.00 ti counterpart ti DOLE iti inaldaw a sueldo dagiti estudiante.

Kangrunaan a panggep ti SPES ti pannakaited iti pagsapulan kadagiti marigrigat nga estudiante iti bakasion tapno adda busbosenda para iti panagenrolda iti umadanin a panaglukat ti klase.#