83 nga addang iti napalabas (Maikadua a paset)

Sarita ni  Danny B. Antalan

 83 nga addang

Pinadasko ti tumakder manen babaen ti panangisentrok iti nabatbati a pigsak iti sarukod. Kunada iti ingles, no pain no gain. Ket isu ti prinsipiok iti daytoy a gundaway.

“Ay apo!” Nangegko ti boses ni Fernando. Ta ania ngarud ket dinak met mabalin atipaen. Madanagannak laeng no madalupoak, ket isunto ti bulonannan ti… yad-adayom Apo.

“Kantiawannak idi ni Gloria ta naparpartak ngem siak nga umuli ken sumalog. Dina la ammo, pabpabus-oyak laeng.” Kinunak kabulon dagiti nadadagsen nga anges.

“Asino a Gloria?”

Ngem diakon simmungbat. Saan a diak kayat a sungbatan ti saludsod, no di ket kasla maangsanak iti bannog. Ta apay ngamin a malagipko ni Gloria ket kayatko laeng met nga ipaay kenkuana ti inspirasion ni Nick Vujicic.

“Sapay koma ta agsarakkami, Apo Santa Maria.” indumogko. Bagik laeng manen ti balikas ken di rumbeng a mangeg ni Fernando. Impadasko manen ti tumakder. Ngem mariknak ket dimmagsen ti ubetko. Agtigerger ti sakak ngem impilitko. Ngimmato ti ubetko ngem idi kuan, nagpukaw ti pigsak ket simmaltek a nagdisso iti semento ti ubetko.

Nadagsen nga aklonen, ngem lingaling ti sungbat iti gagemko.

“Nagluposen ti kinaagkabannuagko!” indennesko ti ulok iti sarukodko.

“Kabaelam dayta, apo!” adda nagtimek iti sikigak. Idi yangadko ti rupak, naipasabat kaniak ti naamo a mata ken bumalitok a pumuraw a buok ti lumabas a baket nga apostolada. Nabukel ti rupa ti baket a kasla di mabannog nga umuli iti agdan.

Nagkiremak. Adda pangiruprupaak kenkuana. Ngem saan a nagsarimadeng ti baket, nagdiretso iti panagnana agingga a nakasagpat iti walopulo ket tallo nga agdan.

“Naglaingen!” diak nailinged ti panangdayaw iti baket. “Kabaelanna ti umuli iti natukantukad nga agdan a kasla di nabannog.”

Minandar ni Fernando ni Onyok nga umasideg kaniak. Babaen ti imana, nariknak ti puersa tapno tumakderak. Inassibaynak agingga a nakababaak iti agdan.

“Diakon a kabaelan!” kinunak. Diak ammo no nakunak daytoy gapu ta saannak nga ulbod, wenno panangaklon iti kinalakayko.

“Diyo ngamin piliten, Amang!” immasideg ni Fernando ket inpatayna ti dakulapna iti abagak.

“Kayatko a makita ti sibubukel a Santa Maria,” insungbatko.

“Mabalinmo met a makita ti Santa Maria a di umuli ditoy agdan. Apay ngamin a kaykayatmo ti narigat a wagas no adda met nalaklaka a pamay-an?” Awan unget ti timekna.

Dina maawatan ti kayatko nga ipasimudaag. Ta kastana manipud naaksidente. Kayatna a nanam-ay amin a wagas, maiyawat wenno maisubo lattan.

Wen, adda sabali a dalan nga umuli iti simbaan ti Santa Maria babaen ti lugan. Agpaabagatan sa agpadaya ket irikos ti lugan iti pauli nga agpaamianan. Nalaklaka a dalan. Nairanta kadakami a nataengan a dinan kabaelan ti umuli iti walopulo ket tallo nga agdan.

“Iti baybay ti kayatko!” inmandarko idi addaakon iti uneg ti lugan.

Nagngayemngem ni Fernando ngem masapul a tungpalenna ti kalikagumko.

“Iti Lingsat wenno Suso?

“No sadino ti yan daniw,” insungbatko.

ANIA ti adda a kinapintas kadagiti nadawel a dalluyon? saludsodko iti bagik. Saan a kinapintas, no di ket lohika. Daytoy koma ti maawatan ni Fernando nga adda ita iti uneg ti van.

Ania ngamin ti kaipapanan ti dalluyon nga agiinuna nga agpaigid ket maburak iti kadaratan? Maysa kadi daytoy a haiku a nauneg ti kaipapanna?

Rimmuar iti van ni Fernando, nagpaiduron agingga iti kadaratan iti asideg ti pagmasmasngaadak. Diak nagtimek. Saan met a nagtagtagari. Kitkitaenna ti kitkitaek. Tinukodko ti panpanunotenna, ngem diak matukod. Kasla dina mangmangngeg dagiti garikgik dagiti ubbing ken nataengan nga agdidigos iti amianan.

“Mangegmo dagiti daniw?” sinaludsodko. Naglingaling.

“Dagiti daniw ni Dr. Godofredo Reyes nga ibikbikag dagiti dalluyon.”

“Saannak a mannaniw. Awan ti daniw iti tao a nakabalud iti de-pilid a lubong. Ta kasano nga idaniwmo ti lubong no aw-awitem daytoy a dusa?”

“Ammom kadi no apay a ditoy Suso ti paborito a pagtataripnongan dagiti mannurat nga Ilocano? Agsipud ta adda daniw kadagiti dalluyon iti baybay. Adda balabala ti sarita iti simbaan ti Santa Maria, ken soneto iti dissuor ti Pinsal Falls.”

(Adda tuloyna)