86-tawenna a biuda, binagsol 80-tawenna a biudo

VIGAN CITY, Ilocos Sur – Ania la unayen ti nadagsen a motibo a nangiduron iti maysa a 80-tawenna a biudo a nangbagsol iti biuda nga agtawen iti 86?

Nakasuan iti homicide ni Francisco Bautista y Pagud, 80, residente iti Barangay Cabigbigaan, Sto. Domingo, Ilocos Sur iti provincial prosecutor’s office, Vigan City gapu iti panangbagsolna ken ni Estepania Gonsalez y Rondon, 86, balo, ken residente iti nasao met laeng a barangay idi bigat ti Pebrero 25.

Iti inisial nga inbestigasion dagiti polis ti Sto. Domingo, agpurpuros iti bunga ti bittaog ni Gonsalez idi inasitgan ti suspek sana binagsol daytoy iti sumagmamano a daras a nagsagrapan ti biktima iti dunor iti abaga, takiag ken bagina.

Naitaray ti biktima iti Tolentino Clinic and Hospital sa naiyalis iti Metro Vigan Cooperative Hospsital, Bantay, Ilocos Sur ngem pimmusay ditoy bayat ti pannakatamingna.

Iti pannakaisurat daytoy, di pay ammo ti motibo ti pammagsol. Di met nasarakan dagiti polis ti patadem a pinangbagsol ti suspek iti biktima.#