89 computer units, naiwaras kadagiti pagadalan

VIGAN CITY – Agdagup iti 89 a computer units ti inwaras ti city government para kadagiti nadumaduma a pagadalan publiko ditoy siudad.

Mismo a ni Mayor Eva Marie S. Medina, kaduana dagiti sumagmamano a konsehal a pakairamanan da Konsehal Juan Carlo Medina, Konsehal Joy Bennet Orio, Konsehal Ramil Arce, ken Konsehal George Villanueva ti nagiwaras kadagiti computer units iti Vigan City Convention Center.

Kinuna ni Medina a puntiria ti city government a maikkan amin a pagadalan iti umdas a computer units tapno adda aramaten dagiti estudiante iti panagbasada.

Puntiria ti city government a maikkan iti tunggal pagadalan iti 30 a computer para iti maysa a klase.

Kinuna ti mayora a masapul a computer literate dagiti ubbing no mapandan iti high school agsipud ta aminen a komunikasion ket patarayenen ti computer .#