9 ili ti I. Sur, makipartisipar iti trade fair

VIGAN CITY – Siam nga ili ti makipartisipar iti sabali pay a trade fair a maangay iti SM Mega Mall, Mandaluyong City inton Sept. 18-20 daytoy a tawen.

Kinuna ni DTI Provincial Officer Grace Lapastura a mai-exhibit iti nasao a trade fair dagiti produkto ti Ilocos Sur manipud iti buri, corn husk, furniture, ken loom weaving.

Sakbayna, nakipartisipar met ti Ilocos Sur iti Food Trade Fair a naangay met laeng iti SM Mega Mall a nakailakuan dagiti  makan a produkto ti Ilocos Sur a kas iti longganisa, bagnet ken dadduma pay.

Kinuna ni Lapastura nga iti baet ti panagtudtudona, napnek met dagiti exhibitors iti kadakkel iti naglakuanda kadagiti produktoda.

Iti masungad a non-food trade fair, kinuna ni Lapastura a ti Ilocos Sur ti kaadduan iti exhibitors iti Region 1.

Kas iti inar-aramidna iti kallabes, suportado ti gobierno probinsial dagiti makipartisipar iti trade fair.#