9 mannalon, natakawanda iti ramramit-talon

BANTAY, Ilocos Sur – Medio bimmassit ti bilang dagitiĀ  natiliw a drug pushers ditoy probinsia maigapu iti imminget a kampania ti kapolisan maikontra iti illegal drug trade ngem dua nga insidente ti panagtakaw a nakabiktimaan ti siam a mannalon ti naireport iti kapolisan iti maudi nga uppat nga aldaw ti Agosto.

Uppat a mannalon ditoy nga ili ti nagpulong iti polis a mapukpukaw ti bombada iti danum a masuspetsa a natakaw idi rabii ti Agosto 30.

Natakaw ti Kubota ER 40 (diesel) nga agbalor iti P21,000.00 a kukua ni Freddie Agbalog y Pascua, 44, naasawaan; ken maysa a Yanmar NS 40 (diesel), nga agbalor iti P30,000.00 a kukua ni Teobanie Arellano y Pico, 37, awanan asawa, agpada a residente iti Brgy Sabangan, San Juan, Ilocos Sur; kenĀ  Kubota ER 40 (diesel) a kukua ni William Peneyra y Tapaya, 41, married, barangay kagawad, nga agbalor iti P20,000.00 ken Yanmar F4 (diesel) a kukua ni Rene Taja y Rabara, 34, naasawaan, nga agbalor iti P15,000.00, agpada a residente iti Barangay Baliw, San Juan, Ilocos Sur.

Segun kadagiti biktima, maibatbati dagiti bomba ti danum iti taltalon.

Saan pay a natuntonan ti nakailakuan dagiti bomba ti danum ken no sino dagiti nagtakaw

Kabayatanna, idi Agosto 28, lima a mannalon ti nagpulong iti kuerpo ti polis ti Sinait a natakaw dagiti electrical wires ti bombada iti danum.

Nagkukuyog a napan nagpulong iti polis a natakawanda da Rodrigo Realgo y Igarta, 51, naasawaan; Rogelio Realgo y Igarta, 54, naasawaan; Myrna Yago y Ibaan, agtagibalay; Danilo Aranda y Marteja, 51, naasawaan; ken Ruben Barbosa y Realgo, naasawaan, electrician, residenteda amin iti Barangay Curtin, Sinait, Ilocos Sur.

Kas maibatay iti pulong dagiti biktima, natakawan ni Rogelio Realgo iti PDX electrical wire a sumurok-kumurang 30 meters nga aggatad iti P1,000.00; maysa rolio a PDX electrical wire a sumurok-kumurang 75 metersĀ  nga aggatad iti P2,500.00 ken ni Yago; kagudua ti rolio a PDX electrical wire nga aggatad iti P1,250.00 ken ni Aranda; kagudua rolio a PDX electrical wire nga agbalor iti P1,250.00 ken kagudua rolio ti PDX electrical wire nga agbalor iti P1,250.00 ken ni Barbosa.

Naduktalan ni Realgo a natakawan ken dagiti kakaduana idi agsapa ti Agosto 28.

Impalgak pay ni Realgo nga immuna a natakawan idi Agosto 19 iti maysa a rolio ti PDX electrical wire nga aggatad iti P2,500.00.

Iti pannakaisurat daytoy, di pay ammo no asino ti nangtakaw dagiti barut ti koriente.#