9 natulnog agbayad iti korienteda, pinadayawan ti ISECO

SANTIAGO, Ilocos Sur – Walo nga ili ken maysa a siudad ditoy probinsia a natulnog nga agbayad iti makunsomoda a koriente ti pinadayawan ti kooperatiba ti elektrisidad ti probinsia itay napan a bulan.

Karaman dagiti napadayawan  nga il-ili gapu iti kinatulnogda nga agbayad iti billda iti koriente ti ili ti Banayoyo, Galimuyod, Lidlidda, Quirino, San Esteban, Santiago, Sinait ken Sugpon ken ti Siudad ti Candon.

Napadayawan dagitoy bayat ti general assembly nga inangay ti ISECO iti kangrunaan nga opisinana ditoy idi Disiembre 14, 2013.

Sakbay ti programa, maysa a presscon ti inangay dagiti opisial ti ISECO a nangipalawaganda kadagiti kangrunaan a polisia ken programa ti kooperatiba para iti pagsayaatan dagiti kustomer.

Kasla pagpiestaan ti main office ti ISECO gapu iti kaburnok dagiti immatendar iti general assembly no sadino a naiwaras dagiti payong ken naangay ti maysa a paripa a nakaitedan dagiti nadumaduma a premio.#