9-oras nga awan koriente iti umuna a distrito ti Ilocos Sur

VIGAN CITY – Awan ti koriente iti umuna a distrito ti Ilocos Sur idi Mayo 30 kas paset ti tinawen a preventive maintenance kasta met iti testing iti 100MVA transformer iti San Esteban substation.

Uray ti Ilocos Norte nagawan iti koriente iti kastoy met laeng a kapaut iti daytoy nga aldaw, daytoy ti naammuan manipud iti Ilocos Norte Electric Cooperative.

Segun iti maysa nga opisial ti National Grid Corporation of the Philippines (NGCP), naiwayat ti power outage kas tinawen a preventive maintenance dagiti amin a linia ti koriente iti Luzon Grid sakbay ti panaggibus ti summer season ken tapno masigurado ti agtultuloy a suplay ti koriente para kadagiti distribution utilities kabayatan ti panagtutudo ken di mapakpakadaan a panagawan ti koriente.#