9 plantasion ti marihuana, rinaut dagiti police operatives

CAMP BGEN OSCAR M FLORENDO – Siam a plantasion ti marihuana ti rinaut dagiti nagtitipon a police elements iti nasulinek a lugar sadiay Sugpon, Ilocos Sur idi malem ti Oktubre 5 ket pinarut ken pinuoranda ti nasurok tallopulo ribu a fully grown marijuana plants ken bunubon, daytoy ti impakaammo ti regional director ditoy itay nabiit.

Kinuna ni Police Chief Superintendent Ricardo C. Marquez, Region 1 police director, nga agdagup iti 21,200 fully grown marijuana plants ken 10,600 seedlings ti pinarut ken pinuoran dagiti nagtitipon nga elemento ti ISPAIDSOTG, ISPPSC nga indauluan ni PCI Ernesto Navarro, PDEA 1 ken Sugpon Municipal Police Station iti panangipangulo ni Police Inspector Eduardo Mutong babaen ti direkta a superbision ni OIC Provincial Director Police Supt. Jemar Modequillo.

Kinuna ni Marquez a daytoy ti kadakkelan nga operasion ti marijuana eradication iti daytoy a tawen.

Mapattapatta nga agbalor iti nasurok P5 milion dagiti naparut a pinuon ti marihuana a naimula iti siam a plantasion a mapattapatta nga aglawa iti 3,940 metro kuadrado.

Kabayatanna, kinuna ni Modequillo a rinaut dagiti police elements ti innem a plantasion daytoy maiparparit a mula iti Mt. Ibaoan, maysa iti Mt. Agay,  maysa iti Mt. Caang ken maysa iti Mt. Baeng apaman nga impakaammo kadakuada ti maysa a civilian asset iti kaadda dagitoy a plantasion iti Sugpon.

Innayon ni Modequillo a resulta ti naing-inget a kampaniada maikontra iti illegal drugs ti insayangkatda a MJ eradication iti Sugpon ket impanamnamana nga adda pay dagiti sumaruno nga operasion tapno mapugipog ti illegal a droga iti probinsia.

Awan ti natiliw ti raiding team a mangtartaraken kadagiti mula a marihuana.

Pinuoran dagiti polis dagiti pinarutda a mula ti marihuana ket nangibabada laeng iti sumagmamano a punggos para iti dokumentasion ken disposision iti Ilocos Sur PPO.#