9-tawenna nga ubing, nadungpar, natay

NARVACAN – Naideklara a dead on arrival iti ospital ti maysa nga ubing gapu iti pannakadungparna iti lugan iti national highway ti Barangay Sulvec ditoy nga ili idi malem ti Disiembre 12.

Nainaganan ti biktima a ni Arjay Salomon y Ancheta, 9, residente iti nadakamat a barangay idinto a nabigbig ti drayber ti Hyundai Grace PUV a ni Jaime Castillo y Bilen, 38, naasawaan, ken residente iti Barangay Namalangan, Santa, Ilocos Sur.

Iti report manipud iti polis ditoy nga ili, agpaamianan ti PUV ket idi makadanon iti nakapasamakan ti aksidente, mapapati a kellaat a bimmallasiw ni Salomon ket nupay dagus a nagpreno ni Castillo, kaskasdi a nadungparna ti ubing a nagsagrapan daytoy kadagiti nakaro a dundunor.

Awanen ti biag ti biktima idi maidanon iti Central Ilocos Sur District Hospital.#