Footer

Abel Iloko, Naitampok iti Tawid ken Partuat

Mandaluyong City – Immabot iti  P4.1 million ti napastrek ti probinsia iti napagtitipon a naglakuan dagiti 55 a nakipartisipar iti Tawid ken Partuat Trade Fair a naangay itay Nobiembre 5-9 iti SM Megamall itoy a siudad.

Kinuna ni Gov.Deogracias Victor Savellano a dakkel a balligi ti uppat nga aldaw a trade fair a nakaitanduduan dagiti partuat nga abel-Iloko kas iti ules, supot ti pungan, labakara ken dadduma pay a produkto  dagiti umaabel iti probinsia manipud Caoayan agingga iti Santiago.

Kinuna ni Savellano a ti Tawid ken partuat ket mangipakita iti panagkaykaysa, kooperasion ken commitment dagiti opisial ken umili ti Ilocos Sur, ken iti kinamanagpartuat (craftsmanship) ni Ilokano idinto nga innayonna a  kasapulan unay dagiti kakastoy nga okasion tapno maipakita dagiti produkto ti probinsia iti sabali a lugar.

Mismo a da Savellano ken Deputy Security Adviser Luis “Chavit” Singson ti nanglukat iti nasao a trade fair idi Nobiembre 5 ditoy.

Kinuna ni Savellano a mangrugi iti small and medium enterprises ti panagballaigi ti aniaman a negosio ket dinawatna a gundawayan dagiti babassit a negosiante amin nga oportunidad a maipaay kadakuada, kasta met nga itultuloyda ti panangpapintasda iti kalidad dagiti aramidda saan laeng a para iti lokal a merkado.

Impaganetgetna a madadaan kan' ti opisinana a makitinnulong iti Department of Trade and Industry iti Ilocos Sur nga idauluan ni Provincial Director Grace Lapastura a mangipaay iti financial assistance kadagiti agkasapulan.

Kinuna met ni Singson a dakkel a banag ti maaramidan ti trade fair  para kadagiti babassit nga agpupuonan ket kasapulan a suportaran dagiti agtuturay daytoy nga addang.

Kabayatanna, kinuna ni Trade Ambassador to the European Union Atty. Ma. Romela Bengzon nga “adda iti ima dagiti SMEs ti panagrang-ay ti pagilian ta dakkel ti pasetda iti pannakapaadda ti adu a pagsapulan.”

Naangay met ti Abel Iloko Red Carpet Fashion Show a nagpaayan ni Winona Santos kas overall coordinator idi Nobiembre 8.

Nangpangayed iti fashion show a dinesenio ni Dita Sandico Ong a duapulo ken liman a tawen nga agdisdisenio iti abel-Iloko ti panagrampa dagiti opisial ti Ilocos Sur iti panangidaulo da Savellano, agama a Chavit ken Dip. Ronald Singson, Quezon City 1st District Representative Vincent “Bingbong” Crisologo, SPM Azucena Purisima, Sta. Maria Mayor Emma Florendo, Sta. Lucia Mayor Ferdinand Hernaez ken San Ildefonso Vice Mayor Amante Purisima II ken dagiti lima nga annak ti gobernador  a da SK Federated Pres. Deogracias Jose Victorino, Mariel, Patricia, Nicole ken Marie.#