Abra, suportado ken ni GMA: Cong. Luna

BANGUED, Abra – Awan ti protesta a nangsabat ken ni Pres. Gloria Macapagal-Arroyo iti ibibisitana ditoy idi Marso 19,  2008.

Kasta met nga iti umuna a gundaway, simmurot kenkuana ni First Gentleman Mike Arroyo iti ibibisitana ditoy manipud idi rimmuar ti isyo ti NBN-ZTE deal a mapapati a nakairamanan ti asawa ti Presidente.

Indauluan da Abra Governor Eustaquio “Takit” Bersamin, Congresswoman Cecilia Luna, dagiti mamayor ti Abra dagiti nasurok sangaribu a residente ditoy a nangpasangbay iti Presidente ken ti bunggoyna iti panagbisitada iti Peñarubia ken ditoy ngulo ti probinsia.

Inlawlawag ni Luna bayat ti interbio kenkuana ti media a nabara ti pannakasarabo ti Presidente gapu ta suportado dagiti umili kenkuana.

Idi madamag no adda inkalikagum ni GMA a suporta kenkuana nangruna ita a nabara ti ZTE deal, kinuna ti diputada  nga awan ti imbagbaga ni GMA.

“Awan ti nadakdakamatna… tsaka, uray dina ibaga, talaga a dagiti umili ti Abra, dagiti mamayores ken amin nga opisial ket all-out support kay Madam,”  kinuna ni Luna.

Iti isasangbayna iti Little Flower High School, naited iti Presidente ti tapis ket nakiggiddan daytoy a nagtadek kadagiti kameng ti Tingguian sada nagdiretso iti stage a nakaaramidan ti bassit a programa.

Bayat ti programa, naiwaras ti 50 bags a bagas manipud iti Department of Agriculture, 1,800 a Philhealth cards a naipaima ken ni Gov. Bersamin, 500 grocery packs manipud iti Department of Social Welfare and Development, 2,500 a grocery packages manipud iti National Food Authority, 30 a GMA kits manipud iti TESDA ken dadduma pay.

Kalpasan ti programa, nagrikos ti Presidente iti merkado publiko ti Bangued a nakilinnamano kadagiti tattao ditoy ken nangkita iti presio dagiti magatgatang.

Dimmagas pay ni GMA iti  police provincial office ket ditoy a kinapatangna dagiti provincial officials nangruna dagiti mayor mainaig dagiti proyekto a maiyeg  iti Abra.

Inkari ti Presidente nga adda dagiti tulong a maipan iti Abra kas dagiti water system, infrastructure ken dadduma pay ken iti panagsublina ditoy inton bulan ti Abril. (Danny Antalan)