Abrasa ti kasapulan ti plumada

DUA a dadakkel nga organisasion dagiti agdadamo a mannurat ti nabayagen a nabukel: ti Timpuyog dagiti Agessem iti Literatura Dagiti Ilokano a Pintek (wenno TALDIAP) a nabuangay idi Setiembre 15, 2005; ken, ti Isagutko Kenka Writers Club (IKWC) a nabuangay idi Disiembre 22, 2006. Manipud iti nagduduma a sector dagiti kameng ken opisiales: estudiante, OSY, mannalon, mangngalap ken iti labor sector, nagannak, dagiti oldies but goldies, ken dadduma pay a sektor.

Nangbukelda iti timpuyogda tapno lalo pay a tumibkerda. Tapno isudan a mismo iti agiinnadal.

Iti gartemda nga agsurat, kasda la nakakita iti marsaba a salamagi. Napingetda a makasursuro nga agsurat iti daniw ken sarita.

Ngem saan nga umanay ti inda panagpursigi no awan ti mangabrasa kadakuada, no awan ti mangidalan kadakuada kadagiti umno nga aramidenda.

Ad-adda pay ti inda panagpursigi iti saanda a pannakatarabay, ket kuna ni Leonardo R. Agunoy, maysa a pundador ti TALDIAP: “Ti timpuyogmi ti konseho a pakakedngan ti parikut tapno maisarakan-maipamuspusan iti risut….”

Iti met IKWC, kuna ti agbayserda, ni Ms. Estrelita “Mama Es” Del Rosario, station manager ti 90.7 MHz FM Radyo Natin, iti pannakiumanko kenkuana idi aldaw ti Abril 7, 2007: “Addaanda iti regget ken napipintas dagiti kapanunotan ken paniriganda kadagiti sursuratenda, isu a naan-anay ti itedko a suporta kadakuada…”

Nakapamindua pay ketdin a nagpaseminar-workshop ti IKWC. Napasamak idi Abril 21, 2007ti kaudian iti mismo a residensia ti presidente, ni Romeo Licudine, iti Brgy. Saoat, Tagudin, Ilocos Sur. Agmalmalem ti inda panagiinnadal no kasano ti agsurat iti daniw ken sarita. Adda met pasalipda nga on the spot poetry writing contest kadagiti worksiapda.

Daniw ti ipangpangruna dagiti dua a timpuyog, a kas radio base wenno ad-adda a radio ti outlet dagiti putarda: ti IKWC, iti 90.7 MHz FM Radyo Natin a masarakan iti Barangay Magsaysay, Tagudin, Ilocos Sur.

Sakupen daytoy a timpuyog ti probinsia ti Ilocos Sur ken La Union. Dakkel ti bilangda ta umabutda iti nasurok sangagasut ket pitopulo dagiti rehistrado a kameng. Maibasa dagiti daniwda iti programa nga “Isagutko Kenka” (a nakaadawan ti nagan ti timpuyogda) babaen ken ni Eduard Britos nga ad-adda nga am-ammo iti nagan a DJ Edwin.

Agpaspasalip pay ti timpuyogda iti panagsuratan iti daniw ken ababa a salaysay.

Iti TALDIAP, maibasa dagiti daniw iti programa a para iti literatura iti CMN Radio DZEA iti Siudad ti Laoag babaen ken ni Leonard Domingo Villa, iti pannarabay ti naanus nga station manager, ni Rev. Fr. Nolasco “Tom” Pascua.

Malaksid iti radio, naipablaak met dagiti putar dagiti dua a timpuyog kadagiti dua a kadakkelan ken kalatakan a rehional a pagiwarnak, ti Tawid News Magasin iti Rehion I ken ti The Valley Journal iti Rehion II.

Iti Tawid, inikkak iti bennegda, (a kas editor) “Ti Benneg Dagiti Kattungbol” (The Budding Writer’s Corner) a pakabasaan kadagiti dandaniwda. Napaliiwko a nag-darasda a makasursuro ken sadiwa (fresh) dagiti idea dagitoy a mannurat. No naan-anay ti pannakatarabayda, lalo pay a bumaknang ti agamang ti Literatura Ilokana.

Kadagiti ipatpatulod ti “The Valley Journal” a kopiak babaen ti editorda, ni John Buhay, ken presidente ti Timpuyog Dagiti Mannurat iti Iluko (TMI Filipinas), napaliiwko kadagiti sinuratda iti isu met laeng a laing, panirigan, kapanunotan ken sirmata dagitoy a mannurat kadagitoy dua a timpuyog.

Kasapulan unay ti pannarabay dagiti dua a timpuyog ta iti masak-bayan, isudanto ti mangitakder ken mangparang-ay iti bukodtayo a dila.

“Apay a dimo buklen ti timpuyog dagiti mannurat iti radio?” impalapalko a karit ken ni Danny Antalan, news reporter ti Tawid News Magasin ken reporter-anchorman ti DZTP, Candon City. Adda met programa ni Danny a para Literatura Ilokana. Dandani payen aggibus ti Salip iti Daniw 2007, nga inesponsoran da Arlane Manzano, Terry Tugade ken dadduma pay. Ngem awan ti timpuyog dagiti mannurat ti DZTP. Isu nga insingasingko ti pannakabuangay ti timpuyogda wenno panagtitipkel koma met dagitoy a mannurat ken aggessem iti literatura nga agsursurat iti DZTP.

Abrasa ti kasapulan ti plumada tapno dumur-as pay. Kasapulanda ti nabara a takiag a sadagda iti inda panagkalatkat.

(Adda tuloyna)