Abreco, naputolan iti koriente ta di nakabayad iti utangna.

BANGUED, Abra – Iti sanguanan ti amak dagiti umili ditoy a pasangbayenda ti Paskua iti kasipngetan gapu iti posible a pannakaputol manen ti suplay ti koriente ti Abra Electric Cooperative (Abreco), itudtudo ti maysa a nangato nga opisial a politika ti adda iti likudan ti power crisis iti probinsia.

Segun ken ni Abreco General Manager Loreto Seares, Jr., kayat ti gobernador a masuktan tapno maipatugawna ti taona iti nasao a puesto iti nasao a kooperatiba ti elektrisidad sakbay ti panagpipili inton Mayo 2013.

Kinuna pay ni Seares a pinagbalin ni Gov. Eustaquio Bersamin, Jr. ti pannakaputed ti koriente a suplay iti kooperatiba tapno maidur-asna ti panggepna iti politika.

Pinuted ti Aboitiz Power Renewables Inc. (APRI) ti suplay a koriente ti kooperatiba idi apaglabes ti tengnga ti aldaw ti Disiembre 10 gapu iti panaglibtaw ti Abreco a nagbayad iti utangna iti nasao a nasao a pribado a suplayer.

Nupay kasta, insubli met la ti APRI ti koriente idi alas 3:30 idi Martes kalpasan nga inisial a nagbayad ti Abreco iti P4.9 million.

Pinaglibakan ni Bersamin nga adda iti likudan ti pannakaputed ti suplay ti koriente iti Abreco a puon ti blackout iti sibubukel a probinsia iti dua nga aldaw.

Inkalintegan ni Bersamin nga awan ti bilegna a kas gobernador a bumiang iti pannakapataray tiΒ  kooperatiba.

Ipawil ti baro a Philippine Cooperative Code ti politikal a pannakibiang iti internal affairs dagiti kooperatiba.

Kasta met a kinuna ni Ria Calleja, Aboitiz Power assistant vice president for corporate branding and communication, a pinuted ti kompaniada ti suplay ti koriente ti kooperatiba gapu iti panaglibtaw ti Abreco a nagtungpal iti tulagan mainaig iti panagbayadna iti utangna.

Mapapati a nangrugi pay idi Hunio daytoy a tawen a napatpatulodan ti Abreco iti disconnection notices gapu iti saan a pannakabayad ti kooperatiba kadagiti dumakdakkel nga utangna.

Mapapati a nangiyisio pay ti kooperatiba iti 15 a tseke kas inisial a pagbayadna ngem timmalbogda amin.

Segun iti APRI, agdagup iti P53 million ti outstanding arrears ti Abreco a pakairamanan ti P32 million iti security deposit ken P21 million iti dina nabayadan a bills.

Maputdan koma iti suplay ti Abreco idi bulan ti Septiembre 2011 no saan a bimmallaet ken impatalged da Gov. Bersamin ken Congresswoman Jocelyn Bernos a tumulongda iti pannakaidaras ti panagbayad ti Abreco iti utangna.

Maipalagip a nagpinnirma ti Aboitiz ken ti Abreco iti katulagan idi Disiembre 26, 2011 a suplayan ti pribado a kompania iti elektrisidad dagiti 27 a munisipalidad iti probinsia.

Kinuna ni Calleja nga adda manen bayadan ti Abreco a P15.3 million inton Disiembre 24 para iti bills daytoy iti bulan ti Nobiembre.

Kinuna ni Calleja a mangnamnama a saan a mataktak ti Abreco nga agbayad iti utangna.

Kabayatanna, kinuna ni Cordillera Police Director Chief Supt. Benjamin Magalong a tratarenda iti Commission on Elections ken ti gobierno ti Abra ti problema ti elektrisidad tapno saan a makaaapekto daytoy iti pannakaisayangkat ti panagpipili inton Mayo 2013.

Kinuna pay ni Magalong a bumisita iti mabiit iti Abra tapno kitaenna ti situasion ti seguridad iti nasao a probinsia.

Maysa met a petision ti indatag dagiti miembro ti kooperatiba a nangidagadag iti pannakaisayangkat iti espesial a general assembly tapno maammuan ti pudpudno a pinansial a kasasaad ti kooperatiba.

Nupay kasta, mapapati nga awan ti opisial a nangawat iti nasao a petision.#