Abusado a Canadian national, makasuan

BANTAY, Ilocos Sur – Uray ditoy Ilocos Sur , adda abusado a ganggannaet ket dina pay ipirpirit ti maysa a a maraem a hues.
Personal a nagreport ni Judge Bonhoefer Bernardez y Vergara, 36, presiding judge iti Municipal Trial Court, Bantay, Ilocos Sur ken residente iti Zone 5, Bantay, Ilocos Sur ket inreklamona ti maysa a ganggannaet a nangsapgid iti luganna ken nangbassawang kenkuana.

Segun iti police journal, idi agarup 2:45 ti malem ti Abril 18, agdaldaliasat ti Ford Fiesta a minaneho ni Bernardez iti national highway a sakup ti Barangay Banaoang, Bantay, Ilocos Sur idi nakasabatna ti grupo dagiti lallaki a nagsakay iti big bike motorcycles ket maysa daytoy ti nangsapgid iti makannigid a side mirror ti luganna.

Segun iti report, nabannayat ti panagtaray ti lugan ni Bernardez agsipud kadagiti abut ti matartarimaan a kalsada ngem nataray ti motorbike ti ganggannaet a nakasapgid iti side mirror ti lugan ti hues.

Nabigbig ti Canadian national a maysa a Lamy Ghyslain, 36, baro, aircraft engineer ti Eurocopter Phils, agikut iti Foreign Driver’s License No. L5004-080877-04 a naiyisio idi Hulio 31, 2013 ken agpasonto inton Agosto 8, 2017, maysa a Philippine Non-Professional Driver’s License No. X01-11-004034, ken residente iti 28 Balmory, San Lorenzo Village, Makati City ken150 Rue Fauteux, Sherbrooke, Quebec City, Canada J1L 1S1.

Mapapati nga inasitgan ni Ghyslain ni Bernardez sana imbugkaw ti: “Are you insane? Do you Know how to drive?” iti pay met imatang ti asawa ken anakna a kaduana iti kotse.

Kalpasanna, nagpakaskasen ti Canadian national ken dagiti kakaduana nga immadayo.

Nangipatulod ti polis-Bantay iti flash alarm kadagiti kabangibangna a police stations para iti pannakapasardeng ti grupo ket na-intercept dagitoy iti Santiago.

Naipasubli ni Ghyslain iti Bantay police station ket nadetene ditoy kalpasan nga awan ti naipakitana a pasaportena bayat ti inbestigasion.

Iti pannakaisurat daytoy, naisaganan ti kaso a reckless imprudence resulting to damage to property with grave slander and abandonment of victim maikontra iti Canadian national.#