Accounting dagiti narekobre a carnapped a luglugan, naibilin

BANTAY, Ilocos Sur – Imbilin ti police provincial office ditoy ti pannakaisayangkat iti naing-inget nga accounting dagiti narekobre dagiti polis a natakaw a lugan.

Imbilin ni Police Senior Superintendent Eduardo Dopale, Jr. kadagiti amin a hepe iti probinsia ti panangiwayatda iti honest to goodness a pannakabilang dagiti narekobreda a nacarnapped a behikulo kas panagtungpal iti pammilin manipud iti opisina ti regional director mainaig kadagiti nasao a luglugan.

Segun iti memo manipud iti opisina ti provincial director, maiwayat ti accounting dagiti narekobre a luglugan iti sanguanan dagiti report manipud iti media a sumagmamano a polis ti nainbolbar iti carnapping activities.

Naibilin pay kadagiti hepe ti panangidatagda iti updated a report para iti bulan ti Pebrero 2011 mainaig dagiti narekobreda a luglugan ken updated monthly report tunggal maika-7 nga aldaw ti bulan a mangrugi inton Abril 2011.#