Ad-adu nga agmula iti tabako iti pannakaipangato ti floor price ti tabako: NTA

Napintas a damag kadagiti agmulmula iti tabako: naingato ti floor price ti tabako iti daytoy sumaruno a season kalpasan a a daytoy ti napagtitinonganĀ  dagiti mannalon, traders ken agparpartuat iti tabako iti naisayangkat a tripartite conference a naangay iti opisina ti National Tobacco Administration iti Quezon City idi Septiembre.

ā€œSiniguradomi iti kuenta nga adda ganansia dagiti mannalon a 25 porsiento,ā€ kinuna ni NTA Administrator Edgardo Zaragoza kadagiti kameng ti media kalpasan ti nasao a kumperensia.

Ngimmato iti P6.00 kada kilo ti floor price ti tabako a Birhinia a Class AAĀ  ket nagbalin aĀ  P72 kada kilo. Iti naudi a tripartite conference, napag-aanamongan a P66 kada kilo ti floor price ti tabako.

Ngimmato met iti P5 kada kilo ti floor price dagiti nababbaba ti klasena a tabako: Class A – P69/kilo (manipud iti P64.kilo); Class B – P67/kilo (manipud iti P62); Class C – P65 kilo (manipud iti P60); Class D – P60/kilo (manipud iti P55); Class E – P59/kilo (manipud iti P54).

Ngimmato met ti floor price ti palaspas iti P55/kilo manipud iti P50 idi napalabas a panag-tatabako ken nagbalinen a P40 kada kilo ti reject manipud iti P28 kada kilo.

Natuonan met iti P7 kada kilo ti floor price ti barley ken native a tabako.

Tunggal dua a tawen a maangay ti tripartite conference tapno matinong ti floor price ti tabako ket masurot ti kaudian a napagtutulagan a presio iti panagtatabako inton 2012 ken 2013.

Inatendaran ti aganay 40 a dadaulo dagiti mannalon iti tobacco-producing provinces a pakaibilangan ti Ilocos Sur, Ilocos Norte, La Union, Abra, Isabela, ken Pangasinan.

Inlawlawag ni Zaragoza a natinongda ti kuentada babaen ti panangkonsultada kadagiti mannalon, traders ken buyers tapno maammuanda ti husto a magastos dagiti mannalon iti panagmulada iti tabako, pakairamanan ditoyen ti labor ken dadduma pay a production cost.

Kinuna ti administrator nga iti ingangato ti floor price ti tabako, namnamaen ti NTA nga ad-adu manen ti agmula iti daytoy a produkto itiĀ  sumaruno a season.

Ngimmato ti produksion ti tabako iti tawen idi 2011 nga immabot iti 78.5 milion a kilos manipud iti 74 milion a kilos idi 2010.#