Ad-adu ti nagmula iti tabako iti segundo distrito ita a tawen – NTA Candon

CANDON CITY – Ad-adu a mannalon iti segundo distrito ti probinsia ti nagmula iti tabako ken nalawlawa ti namulaan iti 2012 no maikumpara idi napan a tawen, daytoy ti impakaammo ti National Tobacco Administration a nakabase ditoy siudad itay nabiit.

Segun iti datos manipud iti nasao nga opisina, ngimmato ti produksion ti tabako iti maikadua a distrito ti Ilocos Sur ket ti Candon City ti kaaduan ti apit iti daytoy a tawen.

Agingga idi umuna a lawas ti Marso, immabuten iti 10,174 nga ektaria ti kataltalonan ti namulaan iti tabako, nangatngato ngem idi 2011 a 9,991 laeng nga ektaria ti namulaan.  Immadu ti bilang dagiti mannalon a nagmula iti tabako iti daytoy a tawen iti 11,590 maikumpara iti 11,537 a nagmula iti 2011.

Kadakkelan ti namulaan a tabako iti Candon City (1,520 nga ektaria) ken kaadduan ti bilang dagiti mannalon a nagmula (1,567), simmaruno ti Narvacan (1,053 nga ektaria ken 1,207 a mannalon).

Karaman kadagiti dakkel ti produksiona ti Sta, Cruz, Santago, Santa Maria, Burgos ken Salcedo.

Kabassitan ti produksion ti Sugpon, Cervantes ken Suyo.#