Komentario: Adal iti pannakasentensia kadagiti nangiwayat iti Maguindanao Massacre | Tawid News Magazine - Weekly Ilocos News 📰

Adal iti pannakasentensia kadagiti nangiwayat iti Maguindanao Massacre

KALPASAN iti 10 a tawen, nagun-od met laengen ti hustisia dagiti biktima iti nakaam-ames a Maguindanao Massacre a kadamsakan a krimen a mainaig iti politika ken panagatakar kadagiti kameng iti media ta napapatay nga awanan-gaway dagiti 58 a tattao pakairamanan dagiti 32 nga agiwarwarnak idi Nobiembre 23, 2009.

Naguray dagiti adu a Pilipino iti pannakayetnag ti pangngeddeng ni Quezon City Regional Trial Court 221 Judge Jocelyn Solis Reyes iti “most celebrated case” iti Pilipinas iti Milenio ta dagiti akusado ket kameng ti Pamilia Ampatuan a sigud nga akintengngel ti Maguindanao ken ti Autonomous Region of Muslim Mindanao, ken adu a sigud nga opisial ken kameng ti Philippine National Police, ken kameng ti private army ti Pamilia Ampatuan.

Adu dagiti nagbuya ken dimngeg iti “live coverage” iti pannakaibasa iti dispositive portion ti 751 a panid a desision, ket adu dagiti naayatan idi napaneknekan a nagbasol dagiti primary suspect iti Murder iti pannakatay dagiti 57 a biktima iti masaker. Nasentensiaan iti Reclusion Perpetua wenno 40 a tawen a pannakabalud a saan a maparolan dagiti agkakabsat a sigud a Datu Unsay Mayor Andal Ampatuan Jr., sigud nga ARMM Governor Zaldy Ampatuan, ken Anwar Ampatuan Sr., ken 23 pay a primary accused pakairamanan dagiti daaduma a kabagianda, ken miembro ti PNP ken private army.

Nasentensiaan met iti 6 – 10 a tawen a pannakabalud dagiti 15 nga “accessories to the crime” kaaduanna dagiti polis a nakasaksi iti krimen ngem awan pulos ti inaramidda tapno lapdanda ti krimen wenno tiliwenda dagiti nangisayangkat iti masaker.

Naibilin pay ti panagbayad dagiti nakombiktaran iti civil and moral damages kadagiti pamilia dagiti biktima a dumanon iti minilion a pisos. Naimandar met ti pannakatiliw dagiti wanted a 80 pay nga akusado.

Naabsuelto met ni Sajid Ampatuan ken 54 pay nga akusado gapu ta saan a naipaneknek ti prosecution ti pannakainaigda iti krimen. Nagbalin met a 57 counts laeng imbes a 58 counts ti sentensia dagiti nakombiktaran ta saan a nairaman ti kaso ti mapukpukaw a photo journalist a ni Reynaldo Momay a maysa kadagiti mapapati a biktima ti masaker ta saan a nasarakan ti bangkayna ken awan ti nabileg a pakakitaan ti pannakatayna.

Nangipaayen ti manipesto iti korte dagiti abogado dagiti kombiktado nga agipilada iti motion for consideration. Impasingkedda ti panagapilada iti nangatngato a korte para ti pannakaabsuelto dagiti klienteda.

Dagusen a nayakar dagiti nasentesiaan a kombiktado sadiay New Bilibid Prisons, ken impasingked ni Bureau of Corrections Director Gerald Bantag a maipanda iti Maximum Security Cell, ken maitiponda kadagiti kadawyan a balud, ken saandanto a maikkan iti espesial a pannakatrato. Naimandar met ti pannakawayawaya dagiti naabsuelto nga akusado a nakakulong iti Quezon City Jail Annex.

Naragsakan ni Maguindanao 2nd District Representative Esmael “Toto” Mangundadatu iti pannakasentensia dagiti kangrunaan nga akusado a nangisayangkat iti masaker. Bise mayor pay laeng ni Mangundadato idi napasamak ti krimen a nakapapatayan ti asawana a ni Bai Genalyn Mangudadatu, dua a kabsatna a babbai, dua nga abogadona ken pasurotda. Isuda ti mapan koma mangipila iti certificate of candidacy-na a para gobernador iti Maguindanao, kabalubalna ni Andal Ampatuan Jr. Ngem nasaed ken napapatayda.

Iti laksid ti pannakasentensia dagiti primary accused, impalgak ni Magundadatu nga agapilada para ti pannakakombiktar dagiti naabsuelto nga akusado. Kalaksidan iti anak ni Reynaldo Momay, impeksa dagiti pamilia dagiti napapatay a kameng ti media ti ragsakda iti pannakaipaay ti hustisia kadagiti biktima ti masaker. Inrakurak met ti anak ni Momay nga agapilada para ti pannakairaman iti kaso ti napapatay a photo-journalist nga amana.

Ninamnama dagiti legal luminaries a saan amin a naidarum ket nakombiktaran ngem ti napateg ket nasentensiaanen dagiti principal accused, ket adda dagiti proseso a masurot no adda dagiti saan a kontento iti desision ti korte.

Adu dagiti agraem iti tured ni Judge Reyes iti panangbistana iti kaso ken panangsentensiana kadagiti kangrunaan nga akusado ta immunan a nagsanud idi ti lalaki nga ukom a mangtratar iti kaso ti Maguindanao Massacre gapu iti buteng a pannakaisagmakna agraman ti pamiliana.

Kabayatan ti pannakayetnag ti sentensia iti korte idiay mismo uneg ti Camp Bagong Diwa iti Taguig City, nagbalin a nakaing-inget ti seguridad iti uneg ti kampo ken iti courtroom tapno masaluadan ti aniaman a dakes a pagteng. Nagtalinaed a natalna ti pannakaisayangkat ti promulgation of judgement agingga iti pannakayakar dagiti kombiktado sadiay New Bilibid Prisons.

Adu nga adal wenno leksion ti nagun-od a Pilipino iti napasamak a Maguindanao Massacre a gapu iti kinamanagimbubukod iti turay ti maymaysa a pamilia a napatunuynoyanen iti bileg ket saandan a kayat nga adda komontra kadakuada uray kaibatoganna ti panangmasakerda kadagiti adu a tattao.

Daytoy ket ipakitana a panawenen ti pannakagibus ti political dynasty iti Pilipinas ta uray naipalaon dayta iti 1986 Constitution, ngem awan ti nalawag a linteg tapno mapawilan ti panagturay ti dinastia iti politika ti maymaysa a pamilia.

Dakkel a leksion ti pannakainaig ken pannakasentensia dagiti opisial ken kameng ti PNP ta adda pay dagiti addaan iti ranko a Police Superintendent wenno Lt. Colonel, agpababa, ket nagpausarda nga instrumento ti krimen imbes nga isuda ti mangipatungpal ti linteg.

Panawenen a maadal ken makorehir ti mandato iti relasion dagiti kameng ti PNP ken lokal nga opisial tapno maliklikan ti pannakausar dagiti polis iti pannakaitandudo ti interes dagiti politiko.

Naindaklan nga adal met daytoy a kaso kadagiti pasurot dagiti politiko a saanda nga agbalin a “blind followers” dagiti addaan iti bileg ta awan ti agnanayon iti turay, ket saanda a tungpalen dagiti dakes ken illegal a mandar dagiti amoda ta awan ti makasalbar kadakuada no maipakat ti hustisia.

Maibilang met a “wake up call” kadagiti kameng ti media ti masaker iti kanayon a panagannad iti panangannong kadagiti akemda kas agirakrakurak tapno saanton a maulit dayta a kadamsakan krimen kontra kadagiti agiwarwarnak a ti panggepda ket mangipakaammo iti damag kadagiti tattao. ●