Adda an-annayenna a lalaki, pinaltoganna ti ulona

SINAIT, Ilocos Sur – Pinaltogan ti maysa a lalaki ti ulona iti uneg ti kuartoda nga agassawa sadiay Barangay Ballaigui, ditoy nga ili idi agsapa ti Nobiembre 27 a mapapati a maigapu iti an-annayenna.

Inreport ni Venerando Mangrubang y Inovejas, 62, naasawaan, mangaskasaba iti Church of Christ ken residente iti nadakamat a barangay a kinettel ti manugangna a ni Wilfred Ines y Tumbaga ti biag-na babaen ti panangpaltogna iti ulona iti uneg ti kuartoda.

Dagus a natay gapu iti grabe a sugatna iti ulo ni Ines, 38, naasawaan, awanan pangge-dan, ken residente iti Barangay Rang-ay ditoy met laeng nga ili ngem aggigianda a sangapamilia iti balay ti katuganganna a ni Mangrubang.

Iti panagimbestiga dagiti nagresponde a polis, idi agarup 5:30 ti agsapa iti dayta a petsa, mapan koma ikkan ni Yvonne Ines y Mangrubang, 36, iti inumenna a kape ti asawana a ni Wilfred idi makangeg iti kanalbuong manipud iti uneg ti kuartoda.

Dagus nga immuneg ni Yvonne ket nakitana laengen ti asawana a nadigos iti dara iti pagiddaan.

Maysa a cal. 45 pistol nga addaan magasin a nagkarga iti tallo a bala a mapapati a pinangpaltog ti Ines iti ulona ti narekobre dagiti inbestigador iti asideg ti nakapasaganna.

Segun ken ni Yvonne, su-magmamanon a daras a ginandat ni Ines a kettelen ti biagna iti napalabas.

Kinuna pay ni Yvonne a nag-alin a pasiente ni lakayna iti Tan-Yee Therapeutic Home Care Psychiatric and Rehabilitation Center sadiay Cabugao, Ilocos Sur.

Kitkitaen ti polis no adda pakainaigan daytoy an-annayen ni Ines iti panangkettelna iti bukodna a biag.#