Adda foul play iti nasarakan a bangkay ti lalaki?

STA. LUCIA, Ilocos Sur – Kitkitaen dagiti inbestigador no aksidente wenno adda foul play iti pannakatay ti maysa a lalaki a nasarakan a bangkay iti barangay road sadiay Namatican, ditoy nga ili idi parbangon ti Septiembre 29.

Dagitoy ti anggulo a kitkitaen dagiti inbestigador kalpasan a limtuad iti autopsia a nagsagrap iti dunor iti ulo babaen iti natangken a banag a puon ti nakatayanna ni Willy Veroña y Aglibot, 39, baro, mannalon ken residente iti nadakamat a barangay .

Iti panagimbestiga dagiti polis, maysa a Kennedy Turas y dela Cruz, 18, baro, ti nakakita ken ni Veroña a nakadalutaytay iti abay ti motorsiklona nga agdardara ti ulona.

Naammuan pay a sakbay a nakita ti bangkay ni Veroña, napan daytoy iti massayag ti kabagianna iti barangay chapel ket nakita nga adda kinainninumna.

Mapapati a naggawid ti biktima a nakalugan iti motorsiklona idi agarup 11:00 ti rabii ti Septiembre 28 .#