Adda met la naadalmo, ballong? (Umuna a paset)

Salaysay ni Jobert M. Pacnis

 

 

Nalpasen ti klase, Balong. Kayatka man a kablaawan ta naanusam manen ti makatawen iti kunam nga adu a tuok ken rigat iti uneg ti pagadalan. Mawayawayaan met laengen ti riknam. Malukayan metten dagiti nagannak kenka iti rigatda a nangiremremedio iti alawansmo ayatda laeng a malpas ti panagbasam.

Ngem apagbiit laeng dayta. Dua bulan laeng ti palabsen, sumrekka manen iti eskuela tapno ituloymo ti agadal. Sabali manen a tuok. Sabali manen a sakripisio dagiti nagannak kenka. Ngem, ala, anusam ta kas kunada, igammo daytoy iti masakbayan.

Ania ita ti planom?

Agballog? Makibarkada? Panunotem koma, Balong, da tatang ken nanangmo. Tulo-ngam ida. Panunotem dagiti adu a sakripisioda.

Ngem adda laeng damagek, Balong. Komustaka iti uneg ti pagadalan? Kayatko a sawen, naipasam kad’ met laeng dagiti asignaturam? Adda kad’ met laeng naaw-awatam? Wenno umisu kad’ met laeng dagiti nasursurom?

Ne, apay a kasla limmidem ‘ta rupam? Dimo kunaen nga awan nasursurom?

A, ammokon no apay. Siguro, sabali ti inar-ara-midmo. Barkada, di kadi? Makitkitaka ket no kua a nagsapa nga agpagnapagna iti kangrunaan a kalsada ti ili. Ipagpagurupko no kasta nga awanen ti klaseyo kadayta nga oras. Ngem apay a dakdakayo nga agkakakuyogan ti adda a maiwara iti plasa?

Pappapananyo?

Naminsan, iti iseserrekko iti internet café, ta kasapulan nga ipatulodko ti manuskritok ken ni Apo Editor, naranaankayo nga agbabarkada. Agpipinnuk-kawkayo idinto nga agaassideg ti computer a kudkuditenyo. Anian a pannakellaatko ta kunak no agresresertskayo iti mabalin a project-yo. Ngem saan.

Umatipukpok a pinnaltogan, binnomba ti ay-ayamenyo. Nagpapardas man dagiti ramayyo nga agpindot iti no ania dagita command a memo-riadoyo tapno maikkanyo ti bileg ti bida iti ay-ayamenyo. Kasta met ngata ti kinaalib-takyo a mangikabesa kadagiti maisursuro kadakayo?

Idi taliawek ti aglawlaw, awan ni maysa nga agus-usar ti kompiuter a pagreserts koma. Nagadukayo ketdin, aya, nga agmauyong kadagiti cyber-games!

Saan la a namnaminsan a naranaankayo. Uray sadino ti papanak nga internet café, dakayo latta ti bida iti uneg. Isu latta nga isu ti obrayo. Mayat koma no saan nga oras ti klase. Ngem, ayna, kas nakunakon, Balong, uray kangitingitan koma ti klase, addakayo iti internetan a mangib-ibus kadagiti nagbambannogan dagiti nagannak kadakayo.

Dagiti met dadduma, dayta Facebook ken Twitter ti pakakumikomanda. Naimbag la ketdi ta adda ballaag iti tuktok ti computer a DO NOT OPEN PORNO SITE. Ayna, dayta ket ngata koman ti mangsabidong pay iti naganus a panunotyo.

Ngem adda latta met siglatenyo. Naminsan a nara-naankayo, dakdakayo ti adda iti uneg ti internetan, dayta ketdin agop-open kadagiti porno site ti obrayo. Maysa laeng a unit ti rinentaanyo. Sa pinalawla-wanyo ti agseserts a kaduayo. Di kad’ saanen a makita ti nakatugaw laeng a manager ti ar-aramidenyo?

Napangilangilka. Kayatmo a sawen nagbiddutak?

Wenno dagitoy a biliaran, fruit games, kara-krus, inni-numan ti nasangom, Balong, isu a napaulimekka iti saludsodko itay? No ania la ngamin, a, ti ayatem kadagita? Ilunodnaka laeng, Balong. Panunotem koma ti kuarta a  maburbormo kadagitoy.

(Adda tuloyna)