Adda met la naadalmo, ballong?

Salaysay ni Jobert M. Pacnis

 

Ne, ta dimo latta akuen dagita a rason? Wenno naapiangka metten iti maiparit nga agas? Daytan ti kadaksan, Balong.

Saan? Ania ngarud?

‘Diay eskuela? Ne, apayen? Dimo kunaen a pudno ti maal-alimadamadko iti nagbasaam?

Adda kano titseryo a dinakayo pay i-meet koma. Kanayon lattan nga agpakopia. Rasonna nga adu ti obrana iti office. Sa maysa, TLE met laeng ti subject-na ket kaaduanna a panagdalus, kada panagkopia ti masapul nga aramidenyo?

Ne, ta napaisemka, Balong. No kasta, agpayso? Ania pay ngarud ti maleksionyo no kasta? Naimbag, a, no maidiskasto met laeng dagita a kopkopiaenyo?

Nagngilangilka manen? Ania laengen ti obra dayta a mistrayo? Kasanon no ag-quiz, ag-unit wenno ag-periodic exam-kayo, Balong? Kasano ti recitation a paset ti pakakontaran ti gradoyo?

Awan dagita? Ania, agbayadka laeng iti kampay idi ket project, presto addan gradom? Ania ngay dagita a mabayadan? Martilio, cabinet, kurtina?

Uray, a, no agpayso nga adda magatang a kasta para iti industrial wenno TLE room-yo? Ngilangil manen?

Adda pay damagko, Balong, ket sika koma ti mangpennek. Adda kano titseryo a major subject ti iggemna. Science sa dayta. Agpayso kadi a kas karasay ti tugot idiay bulan ti kaaddana kadakayo? No adda man, di pay agbayag uray sangapulo minutos idinto a nasurok a maysa orasna koma kadakayo?

Napatung-edka. Ania laengen ti maad-adalyo no kasta? Apay, di kadi ammo dayta ti prinsipalyo?

Amman? Ken kanayon a maungtan dayta a titser? Apay ngarud a dida pay la ikkaten?

Sabagay, political affiliation iti administrasion ti makagapu.

Agpayso kadi pay, Balong, a no adda kurangmo iti sitsitik nga eksam (sitsitik kunak, a, ta di met masursurot ti leksionenyo koma—aglalaok kano met no ania dayta malagip ti titser sa maysa di pay masurot ti umno a panagaramid iti eksam) ket agbayadka lattan wenno palodam ti selpon dayta titsermo ket presto, addan quizmo?

Napaisemka latta.

Adda kano pay agilako iti unit wenno periodic exam, Balong. Ken no agpatest pay ti dadduma, ti met lattan batog ti nagan ti nagtest ti makorek. Awan met tsekna dagidiay answerna. Agpayso?

Di manen mailadawan ‘ta isemmo.

Daytoy pay, Balong. Ket inton malpasen ti final, aduda ti maragsakan a titseryo no mabagsakkayo, aglalo dagiti graduating ta kuarta manen dayta nga umatiperper? Ta asino met ngay ti kayatna ti agrepiter? Bayadam laengen ti kayat dayta adbaysermo tapno pumasaka. No met nagsutuanna dayta selponmo, isun ti alaenna. No saan, pagatangennaka iti new model.

Tung-edka metten a tung-ed lattan, Balong.

No kasta, agpayso amin a madamdamag.

Nalaing kano pay nga agutang dagiti titseryo kadakayo nga estudianteda. A di met mabaybayadan. Maimenosto lattan iti quiz wenno project nga awan kadakayo?

Ti met kano project dagiti dadduma, saan a mainaig iti subject-yo. Pangarigan ‘ta Science ti pagprojectkanyo. Apay ngay dagita naimasetera a mula wenno haloblaks nga ipasayo? Wenno dayta sangagalon a pinta?

Para iti balay ni titser? Allaka, Balong, dakes dayta nga ibagbagam. Ania, ibagbagam laeng ti agpayso?

Ammok ngaruden, Balong, no apay a kasta laengen ti langayo nga ubbing iti nagadalam. Isu met laeng nga aleng-aleng ti panagbasayo ta pumasakayo met latta uray dikay sumsumrek.

Ala, dika ngarud mababalaw, Balong, no apay a kasta ti idiarmo nga agbasa.

Ngem maudi a balakad, panunotem dagiti dadakkelmo. Mangsapulka iti pagadalan a napipia bassit. Sikanto met la ti marigatan no agtalinaedka iti an-anayen nga institusion a yanmo.

Ala, kastan, Balong. Sapay koma ta nalawlawaganka.#