BANTAY, Ilocos Sur – Adda umdas a suplay ti bagas iti probinsia agingga iti Nobiembre.

Daytoy ti impatalged ni National Food Authority Provincial Manager Fortunato Bulao itay lawasna.

Kinuna ni Bulao nga adda kadagupan a 56,000 a sako a bagas a nakapempen kadagiti nadumaduma a bodega iti probinsia a pakairamanan dagiti sumaganad: Bantay – 17,000 sako a bagas; Cabugao – 10,000; Sta. Maria – 8,000; Candon City – 12,000; ken Tagudin – nasurok a P8,000.

Impakaammo ni Bulao a mailaklako dagiti bagas ti NFA iti P18/kilo kadagiti nadumaduma a retail outlets iti babaen ti Bigasan ni GMA a masarakan kadagiti amin nga ili ken siudad ti probinsia.

Adda lima a retail outlets ti NFA iti Vigan City a masarakan iti tiendaan publiko.

Kinuna ni Bulao a manipud iti 700-1,500 a sako nga NFA rice ti malakoda iti inaldaw ngem bimmaba ti paglakuanda nangrugi daytoy a bulan agsipud ta aglako metten dagiti mannalon a nakaapiten iti mulada a pagay.

Kinuna ni Bulao nga agtultuloy ti panagpautangda kadagiti local government units tapno adda nakasagana nga iyarayatda iti tiempo ti didigra wenno kalamidad.

Segun iti provincial manager, awan pay dagiti LGUs a naglibtaw iti panagbayadda iti utangda iti NFA.