Addan suspetsa dagiti polis iti pammapatay iti Sinabaan

BANTAY, Ilocos Sur – Dati a susik iti pamilia ti maysa nga anggulo a kitkitaen dagiti polis iti pannakapapatay ti maysa a lalaki iti Barangay Sinabaan ditoy idi Disiembre 14.

Napaltogan a puon ti nakatayanna ni Maximo Alasaas, 62, naasawaan, residente iti Barangay Ora West, ditoy met la nga ili.

Segun iti report, magmagna ti biktima ken ti amponna idi paltogan ti maysa a lalaki a nakalugan iti motorsiklo.

Nagsagrap ti biktima ti tallo a sugat iti kannigid a barukongna ket natay iti Metro Vigan Cooperative Hospital.

Nakarekobre dagiti imbestigador iti uppat a kapsula a naggapu iti cal. 45 iti nakapasamakan ti krimen.

Segun iti polis, dua nga anggulo a kitkitaenda ken addan suspetsada.

Nupay kasta, saan a nainaganan ti suspetsa tapno saan a madadael ti inbestigasion.#